Foxes lakah Man United an vannei

An mamawh chu point thum a ni a, mahse point khat chauh an hlawh chhuak - Manchester United chuan goal an phurh hmasak hnuah Leicester City chu 1-1 in an inhnehtawkpui.

Cristiano Ronaldo tel lohna Man United hi Premier League table-ah parukna an ni, palina Arsenal aiin point thumin an hmu tlem. Mahse, Ralf Rangnick-a naute hian match hnihin an khel hnem; Champions League khelh phak a harsa tawh dawn.

Zanin dar 12:30 hian Gunners chuan Crystal Palace an lenchilh dawn. Mikel Areta naute tan season thara UCL khelh phak leh phak loh chu an kuta awm a ni a, khelh hmabak 12 an la neih avangin chetsual theih erawh a la ni.

Inhnehtawk
Old Trafford-ah a lawm hmasa zawk chu Leicester an ni. Minute 63-naah Kelechi Iheanacho chuan James Maddison-a cross tawih zet chu ṭha takin a tauh lut a, keeper David de Gea tan dan ngaihna a awm lo.

Bruno Fernandes-a'n a hun ṭha hmasaah Kasper Schmeichel a paltlang thei lo. A shot vawi hnihna pawh Foxes keeper hian a lo dansak, mahse ball per hi Fred-a'n hnai tak aṭangin a khung, season kal laia goal li a khungna a ni.

Hun tawp hma minute 10 chauh awm tawhah Leicester hian chakna goal khungah an inngai. Amaherawhchu, midfielder Maddison-a'n goal a khung hmain Raphael Varane lakah an foul, referee Andre Marriner-a'n mual sira VAR a en hnuah goal hi a hnawlsak.

United an buai
Damlohna leh harsatna vangin Ronaldo, Edinson Cavani leh Mason Greenwood te an khel thei lo, striker Marcus Rashford chu inkhel turin a inpeih. Mahse, England international Rashford hi bul ṭantu zingah a la tel phak chuang lo.

Minute 55-naah Rashford hi dah luh a ni a, danglamna erawh a siam thei ta bik lo; season tharah Man United ni lo club dang jersey a ha ta zawk a nih pawhin a mak lo ang, manager an thlak erawh chuan boruak a la danglam thei bawk.

Player enkawl bakah Rangnick tan hna a hautak chho mek. An elpui Arsenal mualah an la lenglut dawn, champion tum Liverpool leh team ṭha Chelsea an la hmachhawn dawn bawk, palina ni tur chuan ropui taka an thawhchhuah a ngai ang.

Eng nge an sawi?
Man United manager Rangnick chuan, "Chhiarkawp dana a theih chhung chuan palina nih phak kan tum tur a ni. Tunah chuan Everton nen kan inkhelh tur atan kan inbuatsaih ang," a ti. Ronaldo chu damlohna vanga chawl a nih thu a sawi a, ania aiah Paul Pogba-a'n bul a ṭan tih a sawi bawk.

Brendan Rodgers chuan an goal an hnawlsak chungchang sawiin, "Raphael Varane khan a tawnhriat neih a hmang ṭangkai. An intawk zeuh a, a tlu ta mai a ni, Mahse, Harry Maguire khan a pet chhuak lo a, thil thlen aṭanga goal luh inkarah khan thil dang a thleng hman.

"Hnehna chan phu zawk niah kan inngai a, kan chak zo lo chu pawi kan ti hle," a ti. Foxes hian point 37 hmuin pakuana dinhmun an luah thung a, season thar atan chuan European football beisei a ngamawm loh ang.