Reds & City an chak - nomawi inchuh boruak a 'hot' tial tial

Inrinni zan Premier League inkhelah Liverpool chuan 2-0 in Watford an hneh a, Diogo Jota leh Fabinho (penalty) ten goal khat ve ve an khung - hetihlai hian Manchester City an la inlan lo a, Liverpool-in Premier League table chung ber an luah.

Reds inlan hnuah Manchester City an inlan ve leh a, khualmualah Burnley chu 2-0 in an hneh - Kevin de Bruyne leh Ilkay Gundogan te chuan goal khat ve ve an khung a, hmahruaitu an ni lehnghal!

Liverpool leh City inkarah point khat chiah a awm chhunzawm a, match riat chiah khelh tur awmah team pahnihin champion an la tum ruh hle - April 10, zan dar 9:00-ah, Etihad Stadium-ah Reds an lenglut dawn.

Team pahnih inkhelh zawh press conference pawh an result aiin, an hmabak inkhel tur zawhnain a luah khat hneh zawk a, Premier League nomawi inchuh boruak a 'hot' tial tial.

Liverpool an vannei
Anfield-ah Liverpool an chak a, vanneihna an mamawh thung - Reds-in goal an khung hmain keeper ṭha mi Alisson chuan Cucho Hernandez leh Juraj Kucka chance neih duhawm chu ṭha takin a dansak ve ve.

Minute 22-naah Jota a lo lang a, Portuguese forward hian Joe Gomez-a ball cross chu Watford defender pahnih ven kara zuang chungin a khung a, tun season-a goal 20 a khungna chiah a ni.

Jota hi a vanneih zan ni se hattrick siam thei a ni - mahse, a chance neih dang chu Watford keeper Ben Foster chuan a dansak a, bar chungah uiawm takin a tauh bawk.

Portuguese forward-in goal dang hlawh tawh lo mah se Kucka lakah penalty a hlawh chhuak a, World Cup qualifier a khelh avanga chau tih hriat tak Mohamed Salah a chhuah tawh avangin Fabinho chuan penalty hi a pet a, goal-ah a chantir.

City an chak
Liverpool-in hnehna an chan avangin table chung ber an luah a, mahse, Jurgen Klopp-a'n media hmachhawn tura press room a luh rualin City-in goal an khung ve nghal a, Burnley khelmualah Raheem Sterling-a siamsak chu KDB chuan minute ngana lekah a khung.

Klopp-a'n, "City chuan in zawhna tur pakhat chu an rawn thaichhe nghal a ni maw?" tiin media ho a fiam zui a, team pahnih result aiin an hmabaka an inkhel turin ngaihven a hlawh zawkzia a hai lo.

German coach-in zawhna pawh a lak hmain City-in goal hnihna an khung fel der a, an duhtawk mai lo - minute 25-naah Gundogan chuan a khung ve leh a, Sterling siamsak bawk a ni.

City-in goal dang khung tawh lo mah se minute 25 chhunga an goal hnih khung hi chak nan a tawk a, Liverpool an lehpel nghal. Hetihrual hian team pahnihin an hneh tak Watford leh Burnley erawh tla thei dinhmunah an din chhunzawm zel.

Beiseina
City-in treble champion nih an la beisei - FA Cup leh Champions League-ah an la dam a, league-ah hma an hruai mek bawk. City boss Pep Guardiola chuan, "Kan bei dawn - Liverpool hi an ṭha tih kan hria. Mahse, theihtawpa an beih tur thu an sawi a, chu chu kan pawm a ni," a ti a, a inpeih hle.

Pep chuan sawi zawmin, "Liverpool hi kan lakah an tlawm ka beisei a, mahse, kemahni lakah tih lohah chuan point an hloh ka ring tawh lo. Pressure hnuaiah kan talbuai loh a ngai - kum 2019 khan vawi 14 a zawna chak kan mamawh laiin kan ti tawh a, tunah chuan match riat chak zawn kan mamawh," a ti a, a huphurh lo.

City-in treble an beisei a, Liverpool-in tuma la tih theih loh quadruple an beisei thung. Carabao Cup-ah an champion tawh a, Champions League leh FA Cup-ah beisei an la nei a, league-ah City nen an inum mek bawk.

Klopp chuan, "Tuna kan dinhmun hian min tilawm hle. Ka naute hnenah ka lo sawi tawh a, nipui lai khan March-April ah tun dinhmuna kan din tur thu hi miin min hrilh se lawm takin kan pawm ang," a ti a, pressure vangin a buai lo.