MBA Finals 2022 - Samuel-a a ropui

Mizoram Badminton Association (MBA) hnuaia inelna ngaihhlut, session khat chhunga inelna hnuhnung ber leh ranking point pu hnem ber, MBA Finals 2022 chu khelh zawh a ni ta.

Ramhlun Indoor Stadium, Aizawl-a neih inelna hi session tluan ranking tournament hrang hranga ranking point khawl hnem leh nei sang pariat (8) te inelna a ni a, Mizoram badminton legend Samuel Lalnunmawia hming a langsar leh hle.

March 29 - April 1 inkara neih inelnaah hian Mizoram Police Badminton Club (MPBC) hminga tel Samuel-a hi Men’s Singles-ah a champion a, Joseph Lalhruaitluanga (Jojo-a), Bawngkawn Badminton Club (BBC) chu deciding game-ah hnehin, MBA official tournament ah a vawi 38 nan a champion.

Tuikual South tlangval Samuel-a hi men's doubles-ah Lalmuanawma (MPBC) nen ṭang dunin final-ah Lalrinawma leh Laldintluanga Tlau (BBC) te ṭang dun chu an hneh bawk.

Women’s Singles-ah Zothansangi, Ralte Villa Badminton Club chu a vawi khat nan tournament lianah a champion a, Rebek Lalremruati, Mission Veng Badminton Academy chu deciding game ah a hneh. Sangsangi hi kum 20 mi niin, Assam Badminton Academy, Guwahati ah coaching a kal mek a, a hneh tak Rebek-i hi kum 15 mi lek niin Women’s doubles lamah final a lut bawk.

Women’s doubles-ah F. Vanlalhriatpuii leh Lalrinzuali, Ralte Villa BC te chuan Agnes Lalawmpuii, BBC leh Rebek Lalremruati, MVBA te ṭang dun an hneh a, Mixed doubles lamah Lalnunhlua leh F. Vanlalhriatpuii, Ralte Villa BC te ṭang dun chuan Joseph M. Lalrinawma leh Lalrinzuali (Ralte Villa BC) te an hneh bawk - Saron veng nula Hriati hi tun tournament ah hian category hnihah a champion tihna a ni.

Tun session hman zawh takah MBA hian official tournament vawi nga - Kolasib Open, Serchhip Junior Rankling Tournament, MBA Official Championship, Champhai Masters Championship leh MBA Finals te a buatsaih a, Under-9 boy's & girl's singles aṭanga 60+ Men’s doubles inkarah inelna hi neih ṭhin niin, heng tournament-a category hrang hranga champion hnem ber Champhai District Badminton Association hnuaia mi Ralte Villa BC hnenah Overall Champions Trophy an hlan.