FIFA World Cup-ah team an insemrual

FIFA World Cup 2022 fixtures chu April 1, Zirtawpni khan Doha-ah pawh a ni a, group tin an intluk tlan avangin 'group of death' tia sawi theih pawh a awm lo.

Kumin World Cup hi Qatar-ah November 21 aṭanga December 18 thleng khelh a ni dawn a, thlasik laia World Cup inelna neih hmasak ber tur a ni. Inkhel hi India ram aṭang chuan tlai dar 3:30, zan dar 6:30, 9:30 leh zan lai dar 12:30-ah te khelh a ni ang.

Semifinal inkhel pahnih hi zanlai dar 12:30-ah a thlir theih ang a, December 14-15 hian khelh a ni dawn. Final erawh Lusail Stadium-ah December 18, Pathianni zan dar 8:30-ah khelh a ni ang.

Opening match
Inelna ṭan ni, November 21 hian ṭum danga tih ṭhin dan lo ang takin match thum a awm dawn. Group A-ah Qatar, Netherlands, Senegal leh Ecuador te an awm a, inelna thlengtu tan group stage paltlang a har ang.

Qatar hian opening match-ah Ecuador an hmachhawn dawn. Inelna thlengtu bakah Senegal vs Netherlands leh England vs Iran te an inkhel bawk dawn.

England hi World Cup an champion ṭum, kum 1966 hnua opening match-a an inlan hmasa ber tur a ni. Three Lions hi Europe aṭanga playoff aṭanga tling tur, Iran leh USA te nen an dah kawp. Gareth Southgate-a hote hi an ram ṭhenawm Wales leh Scotland te nen an awm ho thei a, Ukraine an awm zawk thei bawk.

Germany leh Spain
World Cup 2010 leh 2014 champion Spain leh Germany te chu group khatah an awm. Luis Enrique hote hi Euro 2020 an khelh ṭhat avangin beiseina an nei sang a, Germany hi coach thar Hansi Flick hnuaiah an intuai thar bawk.

Chutihrualin group khat aṭanga pahnih an tlin theih avangin Spain leh Germany hi tling tura beisei an ni a, amaherawhchu an group-ah hian Asia team ṭha Japan bakah Costa Rica emaw New Zealand emaw an la awm dawn. World Cup hnuhnung berah khan Germany-in South Korea an hneh lo tih hriat a ṭha.

Ronaldo leh Messi
Portugal-in playoff hmangin World Cup inpettling mah se FIFA ranking vangin seeded an ni pha tho. Cristiano Ronaldo leh a ṭhiante hi group H-ah Ghana, Uruguay leh South Korea te nen an awm.

Lionel Messi telna Argentina chu group C-ah Saudi Arabia, Mexico leh Poland te nen an awm vek bawk. Portugal leh Argentina te hi group stage paltlang tura rinkai an ni.

Argentina leh Portugal te hi group winner emaw runner up emaw an ni ve ve an nih chuan final-ah chuan Messi leh Ronaldo an inhmachhawn thei ang. Team pakhat zawk winner an nih a, pakhat zawk runner up an nih chuan semifinal-ah an inhmachhawn thei ang.

Group Inṭhen Dan
Group A: Qatar, Ecuador, Senegal, Netherlands
Group B: England, Iran, USA, Wales/Scotland/Ukraine
Group C: Argentina, Saudi Arabia, Mexico, Poland
Group D: France, UAE/Australia/Peru, Denmark, Tunisia
Group E: Spain, Costa Rica/New Zealand, Germany, Japan
Group F: Belgium, Canada, Morocco, Croatia
Group G: Brazil, Serbia, Switzerland, Cameroon
Group H: Portugal, Ghana, Uruguay, South Korea