Vawiinah Mizoram Vs Tamil Nadu

71st Sr. National Basketball Championship 2022 chu nimin aṭang khan khelh ṭan a ni a, NorthEast champion Mizoram hi group C-ah Tamil Nadu, Uttarakhand leh Delhi te nen an awm. Inelna hi Nehru Stadium, Chennai-ah khelh a ni.

Nizan khan Mizoram hian match hmasa berah Uttarakhand an hmachhawn a, result kan hre hman lo. Vawiin chawhma dar 5:00 hian inelna thlengtu Tamil Nadu an hmachhawn ang.

Mizoram hian nikum December thla khan Shillong-ah NorthEast zone an khel a, an champion avangin final round-ah an inlan thei. Team captain Lalrina Renthlei hi H. Laldinsanga (Mapuia) hnua India tana khel leh thei hmasa ber a ni a, vice captain F. Zodinthara hi Mizo basketball player zinga tawnhriat nei ṭha ber zinga mi a ni.

Mipa team hi head coach KC Lalliantluanga leh assistant coach Lalruatfela ten an enkawl a, NorthEast champion ni mah se National C'hsip-ah erawh team tenau zinga mi an ni dawn. Mizoram hian March 5, Thawhlehni tlai dar 5:00 hian group match hnuhnung berah Delhi an hmachhawn ang.

Group Inṭhen Dan
Group A: Punjab, Gujarat, Kerala, Telangana.
Group B: Uttar Pradesh, Karnataka, Rajashthan, Services.
Group C: Tamil Nadu, Uttarakhand, Delhi, Mizoram.
Group D: Madhya Pradesh, Haryana, West Bengal, Indian Railways.