Real chakna penalty; Atletico chak chiang

Karim Benzema chuan Real Madrid tan penalty vawi hnih a chhuih lut a, vawi khat a pet goal lo a, Celta Vigo lakah Madrid khaw club chu 2-1 in hnehna a chanpui.

Real-in 1-0 a hma an hruai laiin Nolito chuan Celta Vigo tan si phurh a sut a, mahse, Real-in a hnuah penalty vawi hnih an hmu a, Benzema-a'n vawi khat a khung leh avangin 2-1 in an chak.

Inrinni zan inkhel dangah Atletico Madrid chuan 4-1 in Alaves an hneh a, Joao Felix leh Luis Suarez ten goal hnih ve ve an khung. Alaves tana Gonzalo Escalante goal khung chu mualpho zualpui khuhna chauh a ni.

Real-in point 12-in hma an hruai fal a, Atletico hi pathumnaah an invawrh chho bawk - nizan khan Sevilla leh Barcelona an inkhel a, he thu buatsaih a nih lai hian result kan hre hman lo. An inkhel result a zirin point inthlauhna leh table hi a la danglam leh thei.

Benzema = penalty
Celta Vigo khelmuala hnehna chang turin Real-in vanneihna an mamawh tel a, minute 19-na lekah Nolito chu Eder Militao laka a foul avangin Real-in penalty an hmu.

Benzema chuan an penalty hmuh hmasak hi goal-ah a chantir a, mikhual team an pawr. First half-ah goal dang a lut lo a, Nolito chuan a tihsual thup turin minute 52-naah si phurh a sut.

Mahse, Rodrygo laka foul Celta defender Jeison Murillo chuan penalty a chawi ve leh a, minute 64-naah Benzema bawk rawn pen chhuak mah se keeper Matías Dituro chuan a dansak.

Minute nga a liam a, Carlo Ancelotti enkawl Real bawkin penalty an hmu. Kevin Vazquez chu Ferland Mendy lakah a foul ve leh a, Benzema-a'n a hlah nawn lo - Real an chak.

Benzema a ropui
Kum 34 mi Benzema-a'n tun season-ah match 35 khelin goal 34 a khung a, a career-a season khata club tana goal a khung hnem ber record a siam - assist vawi 13 a nei bawk.

France international hian La Liga-ah goal 216 a khung tling tawh a, Real tana La Liga-a goal khung hnem lamah Alfredo di Stefano a tluk chiah - Cristiano Ronaldo (311 goals) leh Raul (228) chiah a phak lo tawh.

Mahse, Celta an hneh danah Real an vannei tih phat rual a ni lo - penalty vawi thum an hmuh bakah Celta tana Thiago Galhardo khung chu offside vanga pawm a ni lo a, Thibaut Courtois chuan Denis Suarez leh Iago Aspas khung ngei tura ngaih chu ṭha takin a dang bawk.

Inkhela referee Pablo Gonzalez Fuertes-a'n Real chu penalty vawi thum a pe a, Celta striker Aspas chuan, "Referee khan Benzema-a'n hattrick a siam loh a hlau a ni ber," tiin a lungawi lo hle.

Atletico an chak
Tluk leh din fawm chunga season an hman hnuah Atletico Madrid-in ngai an awh chho leh ta a, an league match hnuhnung parukah an chak fai vek - Inrinni zan khan Alaves chu 4-1 in an sawp.

Wanda Metropolitano-a inkhelah Atletico tan tun hnaia 'form' thar Joao Felix chuan minute 11-na lekah goal hmahruai a khung a, mahse, beisei an phak lo zui - Alaves tan Escalante chuan si phurh sutna goal a tauh lut ve leh a, 1-1 a ni.

Mahse, Atletico an vannei. Minute 75-naa vannei taka an penalty hlawhchhuah chu Suarez chuan goal-ah a chantir a, Felix chuan minute 82-naah a belhchhah leh bawk - penalty hlawh chhuaktu Matheus Cunha siamsak chu Alaves keeper Fernando Pacheco chuan dang zet mah se a per lehlam a khung.

Atletico tan Suarez chuan a la tar lo tih pholangin, tun season inelna hrang hranga a goal 13-na a khung ve leh a, Atletico an chak chiang - Thawhlehni zanah Manchester City nen Champions League quarterfinal first leg an khel ang.