Number 1 nih lawm nan nomawi

Iga Swiatek chuan world number 1 nih a phu tih a lantir a, tun hnaiah a zawnin match 17 chhung hnehna a chang ta. Inrinni zan Miami Open final inkhelah Polish nula hian Naomi Osaka chu 6-4, 6-0 a hnehin a champion.

Kum 20 mi Swiatek hian season bul a ṭan fuh takzet. WTA 1,000 tournament hmasa pathuma champion thei hmasa ber a ni a, player ropui Steffi Graf (1994, 1996), Kim Clijsters (2005) leh Victoria Azarenka (2016) te hnung zuiin Indian Wells leh Miami Open la kawp thei a ni bawk.

French Open 2020 champion Swiatek chuan, "Tun hnai chawlhkar thum chhung chu a ropui ngei mai, ka chunga thil thleng hi awih pawh a har zawk hial, engkim mai hi ka tan a ṭha zawngin a inher chhuak," a ti.

Chak lo Osaka pawhin hma a sawn, tournament a khelh hnuhnung zawkah khan mittui nen court a chhuahsan, tunah erawh hlim hmel a pu ve thei ta. Japan nula hian rilru lam harsatna a tawh lai chu a paltlang mek.