Brentford lakah Chelsea mualpho

Stamford Bridge-ah Chelsea an che thei lo, mikhual Brentford lakah goal nei hmasa mah se Blues hi 4-1 in an chak lo. Nilaini zana Real Madrid hmachhawn tur Thomas Tuchel-a naute tan result ṭha lo tak a ni.

Inrinni zan Premier League inkhelah chawlhlawk hmain goal a lut lo. Second half tir lamah defender Antonio Rudiger-a'n yard 30 zeta hla aṭangin goal hmahruai a khung a, team ṭha zawk an nih avangin harsa vak loin an chak dawn niin a lang hman.

Mahse, inhamtan tum Brentford lamin thapui an thawh. Vitaly Janelt-a goal hnih bakah Christian Eriksen leh substitute Yoane Wissa goal hmangin an chhanglet a, khualmualah point thum hlu tak an hlawh chhuak.

Denmark international Eriksen hi Euro 2020 laia khelmuala tlu kha niin, tunah chuan Premier League-ah goal a khung leh ta der mai. Bees tan ani an lalut hi thil lawmawm a ni ngei ang, goal khung leh assist bakah team chhungah boruak ṭha a siam.

Brentford coach Thomas Frank chuan, "Christian Eriksen-a hriselna dinhmun an endik khan engkim a ṭha tih kan hria, kan hnena rawn kal a duh kha chuan keini lam tan buaina tur a awm lo. Tuna a rawn thawh leh dan hi thawnthu ngaihnawm bik a ni," a ti.

Chak lo Tuchel erawh a lungawi lo. Blues manager chuan, "Goal kan khung hmasa a, kan dinhmun pawh a ṭha hman hle. Mahse, minute 10 chhungin goal thum kan chhuah, katiang taka goal kan venghim thei lo kha a mak.

"Kan chak loh avangin pawi ka ti, chutih rualin result ṭha leh ropui tam tak kan neih kara thil thleng pakhat a ni tih kan hriat a ngai. Kan tihsualte hi uluk takin kan en let ang," tiin an insiamṭhat nghal tur thu a sawi.

Champions League champion lai Chelsea hian Nilaini zanah quarterfinal khel turin Real Madrid an mikhual ang.