Real Kashmir-in Aizawl FC an hneh

I League kai thar Real Kashmir chuan nimin khan Srinagar-a an mual TRC Turf ground-ah Aizawl FC chu Bazie Armand-a goal hmangin 1-0 in an hneh.

Mizo club hian Aizawla East Bengal an hneh hnua point an hmuh chhunzawm loh avangin team 11 telnaah hian pakuanaah an awm chhunzawm a, Pathianni tlai dar 5:00 hian Goa-ah Churchill Brothers an hmachhawn leh nghal ang.

Kareem a dam
Aizawl FC coach Gift Raikhan-a'n Kareem Omolaja chu starting eleven-ah dah letin Nigerian defender hi Alfred Kemah Jaryan nen tlarhnung laiah an inkawp. East Bengal nena defence laia chhawr Hmingthanmawia chu right back-ah dahin Kolkata club lama goal khungtu Joe Zoherliana a zin ve lo.

Player 11 zingah Lengpui tlangval Zohera tih loh zawng chu East Bengal an hneh ṭuma bul ṭantu vek an ni.

Goal khat a pawi
Aizawl FC-in bul an ṭan ṭha a, Real Kashmir-in goal venhim hna thawk nasa mahse mualneitu hi an insiamrem hnuah an khel ṭha zawk.

Minute 31-naah Nagen Tamang-a corner pet chu Bazie Armand-a'n a tauh lut a, Aizawl FC an chetsualna ngaiah bawk an chesual.

Mizo club hian I League match hnuhnung paliah goal sarih an chhuah a, goal ruk hi set piece aṭanga lut anga chhiar theih a ni. Kashmir aṭanga tauh luttu Bazie hi feet ruk leh inch khata sang a ni a, amah vengtu Mizo tlangvalin a tibuai pha lo.

Hun tawp lamah erawh Kashmir foreigner lian ṭha tak takte hi Aizawl FC foreigner ten an veng zel a, goal dang a luh belh tawh lo a, first half-a vawi khat an chetsual avangin point an hlawh chhuak lo.

Chutih rualin Kashmir-in ṭantu an nei ṭha a, Ivorian forward Gnohoré Krizo-a'n chance tam tak a hlah avangin chak phu hrim hrim tiin a sawi theih bawk.

Goal khungtu?
Aizawl FC player zinga manto bera ngaih theih chu Ansumana Kromah a ni a, Liberian forward hi Mohun Bagan leh East Bengal tan te pawh a khel tawh.

Kromah hian Aizawl FC a zawm tirhin a match hmasa berah Bethlehem Vengthlang hmachhawnin penalty aṭangin goal a khung a, hei bak hi Mizo club tan goal a khung leh tawh lo a, I League-ah phei chuan goal a la khung lo - a taima lo a, a khel ṭha ngai lo.

Kashmir nen pawh hian second half-ah chance ṭha bik a nei a, keeper chiah a hmachawn hnuah a hlah a, Mizo club mamawh 'goal khungtu' mamawh chhanna niin a lang lo.

AFC tan hian Paul Ramfangzauva leh substitute Lalremsanga ten chance ṭha an hlah ve bawk. Mizo club-in goal an mamawh chungin bench-ah Lalkhawpuimawia a ṭhu tluan a, AFC coach Gift Raikhan hian I League bikah a team ṭha ber a la hre fuh lo niin a lang.