Mizoramin semifinal an lut

National Junior Football Championship 2018, Cuttack-a khelh mekah nimin khan Mizoram chu Kerala nen 1-1 a inhnehtawkin knockout stage an lut.

Mizoram hian semifinal-ah West Bengal an hmachhawn dawn a, December 7, Zirtawpni chawhma dar 10-ah an khel ang a, semifinal pakhat zawkah Punjab leh Odhisa te an inkhel ve bawk ang.

Mizoram hian Uttarakhand 5-0 in an hneh a, Chattisgarh 7-0 a hneh zui lehin group match hnuhnung berah hian semifinal lut turin point khat a tawk a, a chhan chu anmahni ang bawka point ruk hmu Kerala aia an goal difference a ṭhat zawk vang a ni.

Mizoram coach Lalremtluanga chuan an khingpuiten ball an vawrh nasat tur thu a sawi lawk a, hetiang chiah hian Kerala hian an rawn khel a, chak mamawh zawk an nih avangin inkhel an thunun bawk.

Minute 23-naah Kerala-in goal an khung a, mual sir aṭanga an ball vawrh chu Kerala forward-in a tauh lut a, Mizoram coach hlauh ang chiah thil a thleng.

Halftime-ah Mizoram coach RT-a'n ground ball-a khelh a ṭul thu a hrilh nawn leh a, second half-ah inkhel a danglam hret. Minute 65-naah Chattisgarh lama hattrick siamtu HP Lalremruata'n si phurh a sut a, he goal hian Mizoram player-te a tiphur bawk.

Mizoram hian goal an khung hnuah inkhel an thunun a, Kerala defender chu HP-a laka a chet mawi loh avangin hnawhchhuah a ni a, hemi hnu hian Mizoramin harsatna an nei tawh lo.

Mizoram semfinal thlen puitu coach Lalremtluanga chuan, "Kan vannei takzetin ka hria. Inkhelh ṭan tirh lamah kan talbuai a, Kerala kha chak thei dinhmunah an ding hman. Amaherawhchu kan naute thawhrimna zarah point hlu tak kan hlawh chhuak a, point hlu tak kan hlawh chhuak," tiin Vanglaini a hrilh.

RT-a chuan, "Lawmthu sawina tur hlir a ni a, Bhubaneswar aṭangin Mizo ṭhahnem takin min rawn ṭawiawm a. MFA-in min duat em em a, kan mamawh ang apiang min tihsak a, player ṭha kan neih bakah training-na hmun ṭha kan neih avangin tun hi champion-na hun ṭha a ni. Tuna nomawi kan chawi loh chuan a harsa ang. Chutih rualin state dang hi an lian riau a, nomawi kalkawng erawh a awlsam dawn lo," tiin champion theih a inbeisei thu a sawi.

December 1, Inrinni
Mizoram 5 - 0 Uttarakhand
MIZ : Emmanuel Lalchhanchhuah 5'; Lalhmingchhuanga Hauhnar 30'; Lalhruaipuia 45'; R. Lalhmingmawia 65';
John Lalmuanpuia 90'
December 3, Thawhṭanni
Mizoram 7- 0 Chattisgarh
MIZ : Lalmuanpuia 10'; HP Lalremruata 21', 65', 69'; Lalnunzira 55'; Jefrey Lalmalsawma 89'; Lalhruaipuia 90'
Nimin Inkhel Result
Mizoram 1 - 1 Kerala
MIZ : HP Lalremruata 65'