MFA Cup champion Champhai

GIG Motors 20th MFA Cup-ah Champhai club FC Vengthlang North chuan Kanan FC 1-0 a hnehin an champion. Keifang Centenary Football Ground-a inkhelah Champhai tlangval Laltlanzova'n goal awmchhun a khung.

Kum 2017 khan Bethel FC chu MFA Cup-ah an champion a, kum nga hnuah Champhai club-in district hrang hrang inelna MFA Cup-ah champion nomawi an chawi leh chiah. Vengthlang North hian fairplay award an dawng a, captain Lalramsanga chu best player-ah thlan a ni bawk.

Champhai an ṭha
Aizawl champion Kanan FC-ah hming langsar an tam a, Mizoram tana feh chhuak tawh an awm nual. Champhai lam erawhin training an nei ṭha a, Chhangphut Field-ah thla khat chhung an training a, a tawp lam kar khat an riak lut.

Khelmual chhungah Vengthlang North-in training an neih ṭhat an pholang a, ṭan phat aṭangin inkhel an thunun. Midfield laia awm captain Ramsanga a langsar a, ball sang a lak deuh vek bakah ball ṭha a pe chhuak bawk.

First half-ah Champhai an chungnung a, Kanan tlarhnung an rim hle. Champhai foward R. Ramdinthara'n chance ṭha a nei a, Lalsawmzela pawh a hnawksak hle.

Kanan erawhin chance an nei meuh lo a, wing back Lalremruata'n crossbar a pet per thung. Second half ṭantirhah Aizawl champion hi che ṭha mah se chak phu zawk Champhaiin hnehna an chang.

Minute 80-naah Champhai winger Sawmzela cross duhthusam chu Laltlanzova'n a tauh goal a, goal dang a luh belh lo. Keifang Centenary Football Ground-a inkhel entu hmaah Champhai club leh anmahni ṭantuten champion an lawm.

Champhai an lawm
Champhai manager H. Vanlalpeka chuan, "Kan fitness a ṭha zawk a, inkhelah pawh kan chungnung zawk. Kan khelh dan thlir chuan goal khat aia tam khung thei tur kan ni. Kan result avangin kan lawm takzet a, kum 2017 hnua Champhaia MFA Cup nomawi kan hawn leh thei hi kan lawm a ni," tiin Vanglaini a hrilh.

FC Vengthlang North hi Champhai DFA-in an buaipui a, an hlawhtlinna hi DFA hnathawh a tih theih. Champhai manager chuan, "Thla khat bawr vel kan training a, a tawp kar khat kan camp bawk.

"Coach PC Lalmuanpuia leh player-te an fakawm. Inelna ṭha taka buatsaihtu MFA leh ṭha taka min thlengtu Saitual DFA chungah lawmthu kan sawi," tiin a sawi. Champhai aṭangin mi ṭhahnem takin inkhel en turin Saitual an pan a, Champhai manager hian mahni sum senga inkhel en tura feh chhuakte chungah lawmthu a sawi bawk.

Champion Kalkawng
Group Stage
FC Vengthlang North 3 - 1 Luangpawl FC
FCV : C. Lalremruata 28', Laltlanzova 74', Lalsawmzela 90+2'
LFC : Lalruatpuia 56'
Lawngtlai FC 0 - 3 FC Vengthlang North
FCV : C. Lalremruata 27', F. Lallawmkima 67', Lalsawmzela 90+2'
Semifinal
FC Vengthlang North 1 - 0 Chanmari FC
FCV : Lalsawmzela 69'
Final
FC Vengthlang North 1 - 0 Kanan FC
FCV : Laltlanzova 80'

Thlirna Tawi
Champion FC Vengthlang North Rs 1,00,000 + Trophy
Runner Up Kanan FC Rs 50,000 + Trophy
Fairplay FC Vengthlang North Rs 10,000
Best Player Lalramsanga Rs 5,000 + Trophy
FC Vengthlang North
Top Scorer Jeremy Laldinpuia (5 Goals) Rs 5,000 + Trophy
Electric Veng FC