Kan duh angin kan khel thei - Remsiami

Women's FIH Hockey Junior World Cup khelh laiah India an che ṭha a, Mizo tleirawl Lalremsiami Hmar chuan an duh leh inbuatsaihna anga an khelh theih thu a sawi.

India hian an match hmasa pahnihah Wales leh Germany an hneh, harsa lo takin quarterfinal an lut. Inkhel pahnihah hian Kolasib star Remsiami hian goal a khung ve ve a, player pawimawh a ni phak.

Senior team tana pawha inlan phak Siami chuan, "Boruak a nuam khawp mai, ruah surin inkhel a tibuai ve ṭep tih loh chu harsatna a thleng lo. Pathian zarah kan inbuatsaih angin kan khel thei," tiin Vanglaini a hrilh.

Remsiami, Lalrindiki leh Marina Lalramnghaki telna India team hian zanin dar 7:00 hian tla chiang tawh Malaysia an hmachhawn leh ang.