Aizawl FC khingpui tur Trau

Zanin dar 8:05 hian Aizawl FC-in Kalyani Stadium-ah Trau an hmachhawn dawn. I League khelh mekah Mizo club leh Manipur club te hi an che ṭha tawk lo a, table chanve hnuai lamah an awm ve ve avangin champion beisei a har tawh. Chutihrualin Championship Stage khel tur erawh la beisei theih a ni a, zanina chak zawk tan kawng zau zawk a inhawng ang.

Trau hian match hnuhnung pathumah chak an nei lo a, chutihrualin an hneh lohte hi table chung lama awm Gokulam Kerala, Mohammedan leh Rajasthan FC te an nih avangin Mizo club tan zuam ngawt a rem lo. Nandakumar Singh-a hote hian Aizawl FC hi an hneh thei a nih chuan Mizo club chungah awmin pakuanaah an awm thei ang.

Aizawl FC hian an match hnuhnung berah Gokulam Kerala 2-1 in an hneh lo a, hun tawp dawnah Robert Primus hnawhchhuah a nih avangin Trinidadian defender hian Trau a hmachhawn thei lo ang. Chutihrualin Mizo club tan chhuanlam siam a thiang lo a, squad ṭha tak an neih avangin Trau lakah point thum hlawhchhuah ngei an tum dawn a ni.