Benfica mualah quadruple beisei Liverpool

League Cup champion Liverpool-in tun season-ah nomawi beisei tur pathum an la nei - Champions League, Premier League leh FA Cup a ni.

Jurgen Klopp-a naute hian tuma la tih theih loh tih ngei tumin, nomawi pali chawi chunga season khar an tum a, pakhat an puitlin tawh a, pathum an la hmabak.

Zanin dar 12:30-ah an tum ram tihlawhtling turin Reds an inlan leh dawn a, Champions League quarterfinal second leg-ah Benfica an lenchilh ang.

Klopp a fimkhur
Liverpool leh Benfica an inhmachhawn dawn tih a chian rual khan tam takin Reds an lawmpui a, mahse, Liverpool boss Klopp-a'n chesual thei an ni tih hriain a ṭawng fimkhur hle.

German coach hian, "Mi tam takin rin kan hlawh zawk thu leh eng eng emaw an sawi ang, mahse, chu chu kan tihsual ni thei hmasa ber a ni.

"Hetianga âtthlak taka chesual lo turin football khawvelah hun kan hmang rei tawk tawh. Benfica hi club lian tak an ni a, ka zah em em a ni," a ti a, a fimkhur hle.

Benfica an ṭha?
Klopp-a'n Benfica laka fimkhur a ṭul thu a sawi a, a thusawi ṭawmpuitu an tam ang - Portuguese club hi Bayern Munich, Barcelona leh Dynamo Kyiv te nen group khata awm chunga last 16 lut an ni a, last 16-ah team ṭha Ajax an pet chhuak bawk.

Benfica hian tlarhnung laia inkawp turin tawnhriat nei ṭha Jan Vertonghen leh Nicolás Otamendi an nei a, midfield-ah tun season-a goal 12 leh assist 17 nei tawh Rafa Silva a awm a, Brazil tana vawi 25 inlan tawh Everton Soares hian tun season-ah goal sarih leh assist vawi sarih a nei tawh bawk.

Bundesliga lama thawm lo nei ve hat tawh, defensive midfielder Julian Weigl pawh a la rintlak reng a, tlarhmaah tun season-a match 34 a khelh aṭanga goal 27 khung thei Darwin Nunez hi ngaihthah a thiang lo ang.

Ngaihtuahna chi hnih
Reds an vul vanglai a ni - an league match hnuhnung 10-ah an chak vek a, hetih chhung hian goal 25 khungin an lamah goal hnih chiah a lut! Benfica tan hmachhawn an châkawm lo ang tih a chiang.

Hriat tel tur chu, Liverpool hian Pathianni zan dar 9:00-ah league match khel turin Manchester City an lenchilh zui dawn a, Portugal-a zin chau Liverpool tan Etihad Stadium-a inkhelh a harsa sawt ang - Klopp-a tan zaninah fing taka player khek thiam a ngai dawn.

Mahse, Liverpool thlamuanna tur tingin City hi zaninah an inkhel ve dawn tho a, Atletico Madrid lenchilh tur an nih bawk avangin Reds aiin an inkhel tur a hautak zawka ngaih a ni.

Liverpool dinhmun
Tun hnaia inhliam Trent Alexander-Arnold-a'n Watford lakah bench a mawi tawh avangin zaninah inlan thei tawh tura ngaih a ni a, Klopp-a'n a la dim duh a nih pawhin Joe Gomez a awm a, manganna tur a awm lo.

Khup hliam Naby Keita a inlan loh a rinawm zawk a, hliam tenau nei Curtis Jones leh Joel Matip an dam tawh thung - Matip hi a inlan chuan centre back-ah Virgil van Dijk nen an inkawp leh ang.

Midfield chu Jordan Henderson, Fabinho leh Thiago Alcântara ten an luahlum leh tura ngaih a ni a, tlarhmaah Klopp-a'n Mohamed Salah, Roberto Firmino, Sadio Mané, Diogo Jota leh Luis Diaz a nei a, duhthlan tur a nei ṭha ṭhe ṭhaw hle.