Man City dal theitu Atletico Madrid

Zanin dar 12:30 hian Manchester City-in Champions League quarterfinal first leg-ah Atletico Madrid an hmachhawn dawn. An inkhelhna hmun tur hi Etihad Stadium a ni a, April 13, Nilaini zan hian Wanda Metropolitano Stadium-ah second leg an khel leh ang.

Europe-a football inelna sang berah hian team pariat Man City, Atletico, Liverpool, Benfica, Villarreal, Bayern Munich, Chelsea leh Real Madrid te chiah an dam tawh. Pep Guardiola leh Diego Simeonte hote inkhela chak zawk hian semifinal-ah Blues leh Los Blancos inkhela chak zawk an hmachhawn ang.

Pep leh UCL
Football khawvela manager ropui ber zinga mi Pep Guardiola ropuina hi sawi nep theih a ni lo a, sawi nep tum ṭalhte erawhin tun hnaia Champions League nomawi a chawi theih loh avangin duh khawp lohna an hmu thung.

Spanish manager Pep hian a inzir chhuahna Barcelona-ah coaching career a ṭan a, Catalan club hi season li chhung lek a enkawl chungin nomawi 14 a chawipui hman. Heng nomawi zingah hian La Liga nomawi pathum leh Champions League nomawi pahnih a tel.

Hlawhtling taka Barca a enkawl zawhah Pep hian season khat chhung chawlh a la a, chumi zawh chuan Bayern Munich a enkawl. Bavarians hi season thum chhungin nomawi pasarih lakpui mah se Champions League nomawi a tel lo. Pep hian German champion hi semifinal a luhpui vek a, Spanish club pathum Atletico, Barca leh Real Madrid te an hneh lo.

Spanish manager hian Man City a zawm a, league harsa bera sawi Premier League-ah pawh a game plan a hlawhtling. Barca a enkawl lai ang thoin passing game hmangin inkhel a thunun a, tharum ngaihna league-a an sawiah player pumraw te zawkte hmun pawimawh a chantir thei hial. Pep-a hnuaia Man City hian nomawi 10 an chawi tawh a, ropui viau mah se UCL nomawi a tel lo.

Season liam ta khan Pep hian Man City hi final hial thlenpui mah se Chelsea an hneh lo. Nomawi chawi theihna hun ṭha an bawhpelh avangin champion turin hna hautak paltlang a ngai dawn a, semifinal thleng tur pawhin Diego Simeone hote an hneh a ṭul dawn a ni.

Pep Vs Simeone
Pep leh Simeone te hi manager langsar ber zinga mi ni mah se vawi thum chauh an la inhmachhawn. La Liga-ah ṭum khat an inhmachhawn a, Pep-a enkawl Barca-in 2-1 in hnehna an chang. Kum 2016 khan UCL semifinal-ah an inhmachhawn a, Simeone kaihhruai Atletico-in an mualah 1-0 in an hneh. Allianz Arena-ah Bayern-in 2-1 in hnehna chang mah se away goal rule hmangin Simeone hote an vannei ta zawk.

Tun ṭum quarterfinal hi Pep-a'n Man City a enkawl hnua Atletico a hmachhawn hmasak ber tur a ni a, coach ṭha pahnih inhmachhawn tur hi en châkawm lai chu a ni. Simeone hi Pep ang thoin manager hlawhtling tak ni mah se Champions League nomawi a chawi thei lo.

Simeone hian Atletico hi nomawi pariat a chawi pui tawh a, Barca leh Real Madrid ropuina hmunah La Liga nomawi vawi hnih a chawi thei a, Europa League pawh vawi hnih a champion tawh. Champions League-ah erawh Simeone kaihhruai Atletico an vanduai a, ṭum hnih final lut tawh mah se an hmelma Real Madrid lakah an tlawm ve ve.

Attack vs Defence
Simeone hi tlarhnung remphui thiam coach a ni a, team ṭha hmachhawn dan a thiam. Atletico hian quarterfinal lut turin Manchester United an hmachhawn a, Cristiano Ronaldo leh a ṭhianten Spanish club tlarhnung an sawi nghing pha meuh lo.

Atletico hian goalkeeper ṭha Jan Oblak an kawl bakah tlarhnungah Jose Maria Gimenez, Reinildo Mandava leh Stefan Savic te an awm. An ṭhatna tak erawh Diego Simeone ruahmanna angin an khel dawn a, tlarhmaah Joao Felix leh Antoine Griezmann te an awm bawk avangin counter attack-ah an hlauhawm ang.

Spanish club hi an squad a chhah ṭha thawkhat a, chutihrualin Manchester khaw club pahniha ṭha zawk Manchester City an hmachhawn tawh dawn. Pep Guardiola hote hi Premier League-ah goal 70 an khung thei a, Liverpool (77) chiah an aia khung tam an awm a, goal venhim kawngah goal 18 chiah la chhuahin an tlarhnung a phui ṭha ber thung.

Tun season-ah away goal rule a awm tawh lo a, quarterfinal aṭanga thlir chuan first leg boruak a dul phah. Chutihrualin City leh Atletico bikah erawh Pep-a'n Madrid an tlawh hmaa dinhmun ṭha zawka din a duh dawn avangin inkhel boruak a 'hot' turah a ngaih theih. English club-in hrem vangin Kyle Walker an chhawr thei dawn lo a, Atletico-in Yannick Carrasco an hmang thei bik lo ang.