Messi, Mbappe leh Neymar ten goal an khung

Paris St-Germain tan Lionel Messi, Kylian Mbappe leh Neymar ten match khatah a rualin goal an khung. Paris club hian Lorient chu 5-1 a sawpin Ligue 1-ah hma an hruai fal, pahnihna Marseille aiin point 12 zetin an sang fal.

Neymar-a'n goal hmasa leh hnuhnung ber a khung, a pahnih hian Mbappe siamsak ve ve a ni. France international Mbappe-a'n goal hnih a neih bakah Messi khung tur a la siamsak cheu bawk.

Mbappe-a'n tun season kal laiah league goal 17 a khung tling ta chiah - Lorient lakah hattrick siam theihna remchang a nei a, mahse a hun ṭha hnuhnung berah goal ban a tih per, goal nga an neih avangin an lawm tawk tho ang.

PSG manager Mauricio Pochettino chuan, "Goal kan khung hnem avangin inkhel awlsam tak tihna a ni chuang lo. Tlarhma lam player ten goal an khung hian a nuam ṭhin, team pumpui an khel ṭha em em a, thinlung takin ka lawm," a ti.

Ligue 1 Results
Strasbourg 1 - 0 Lens
Clermont 2 - 3 Nantes
Metz 1 - 2 AS Monaco
Montpellier 1 - 2 Brest
Saint-Etienne 2 - 4 Marseille
Troyes 1 - 0 Reims
Lyon 3 - 2 Angers
PSG 5 - 1 Lorient