MCL team pahnih leh player an lilam

Mizoram a cricket inelna sang - Mapuia Memorial Mizoram Cricket League khelh a ni dawn. Team pahnih tana hmun ruak awm leh player lilamna neih a ni a, inelna hmachhawn turin Luangmual leh Bawngkawn South ten hmun an lei.

Player lilam zingah Lalrempuia chu a man a to ber. Zarkawt Lords bowler hi Luangmual chuan Rs 37,700 in an lei. Team thar Bawngkawn South chuan player paruk lei khawm nan Rs 31,600 an hmang ve bawk.

MCL-ah hian 1st Division inelna neih zawh taka a sang pali - Ramhlun Venglai, Chhinga Veng, Chanmarians leh Kulikawn te an tling sa. Anni pali bakah Luangmual leh Bawngkawn South te hian April 11 aṭangin inelna an nei ang.

Hripui leng vangin MCL hi kum hnih chhung an khel thei lo. Tournament hnuhnung ber 2019 khan team paruk hnenah lawmman Rs 3,45,000 sem chhuah a ni a, kuminah chuan Rs 6,00,000 sem ral a ni thung dawn a ni.

Team thar pahnih
Aijal Club-ah lilamna hun hman a ni a, Rs 50,000 a zawrh chhuah ṭan niin team lilam hmasak zawk chan tumin team pangain an chhang - Luangmual leh Bawngkawn an in lehthal tawn zak zak. A tawpah Luangmual hian Rs 3,60,000 in an chang.

Tun hma lama first division lama tawnhriat nei tawh Bawngkawn South lamin team pahnihna an hloh nawn duh tawh lo. Team thar Holiday Palace Blasters chuan Luangmual ngamna zatin an ngam a, mahse Bawngkawn hian Rs 3,90,000 in an khum.

Inelna hmachhawn tum zingah Zarkawt Lords, Durtlang Cricket Club leh Holiday Palace ten hmun an chang lo. Luangmual leh Bawngkawn South ten team ṭha lakah eng ang taka ṭha nge an ni tih an fiah thung ang.

Player chungchang
Tun ṭum MCL-ah hian team inlan tur ten an player neihsa an hum vek thei. MCL atana club nei sa ni lem lo, club dang player-te chu lilam an ni a, player lilam 23 bawr vel zinga 20 chu hralh chhuah an ni.

Player lak nan club parukin Rs 2,20,700 an hmang. Player-te hian club-in an lak luhna sum aṭanga 60% an chang ang a, an kalsan tak club-in 20% bakah MCL governing board-in 20% an chang bawk ang.

Club pakhat hian lilamna aṭanga player lak nan Rs 60,000 chin an hmang thei. Team thar Luangmual chuan player pathum lak nan Rs 43,700 an hmang a, pawisa hmang hnem ber an ni - sum an hman hnem avangin an lakah mipui mit a fu dawn.