Juve mualah Inter an chak

Penalty sawi hlawh tak hmangin Inter Milan chuan Juventus 1-0 in an luhchhuah. Goal awmchhun hi Hakan Calhanoglu khung niin, hnehna changtu Inter tan Serie A nomawi humhim beiseina a la nung zel.

Pathianni zan Allianz Stadium-a inkhelah Alex Sandro-a'n Denzel Dumfries a tih tluk avangin penalty a chawi, thil thleng hi video assistant referee hmanga en nawn a nih hnuah penalty hi pek an ni.

Calhanoglu-a penalty pet hi keeper Wojciech Szczesny chuan a lo dansak a, buai nuaih karah erawh a ti lut zui tho. Mahse, penalty pet hmain Matthijs de Ligt chu box chhungah a lo lut hman - VAR an hman hnuah penalty hi an pet nawn a, a goal zui bawk.

Old Lady an vannei tawk lo, defender Giorgio Chiellini leh Denis Zakaria ten bar an tihper ve ve a, striker Dusan Vlahovic-a'n hnai tak aṭangin goal zawnah a pet thei lo, champion beiseina a thamral tluk a ni.

Team pahnih hi an dinhmun a inang lo, an intawn hma hian Juve hi nikum November aṭanga khan league bika tlawm nei lo an ni. Inter erawh an match hnuhnung pasarihah vawi khat chiah an chak, tunah erawh an dinhmun a inthlak hlawk.

Inkhel dangah Napoli chuan Atalanta 3-1 in an hneh a, point 66 hmuin hmahruaitu AC Milan an nihrual - Milan hi match khatin an khel tlem thung. Diego Maradona-a'n a champion pui hnua a vawi khat nan kumin hian beisei an nei sang leh hle.

Jose Mourinho enkawl AS Roma pawhin Sampdoria 1-0 in an hneh a, goal awmchhun hi Henrikh Mkhitaryan khung a ni. Roma hi pangana an ni a, palina Juve nen an inkarah point nga a awm - khelh hmabak match sarih an la nei a ni.

Serie A
Fiorentina 1 - 0 Empoli
Atalanta 1 - 3 Napoli
Udinese 5 - 1 Cagliari
Sampdoria 0 - 1 AS Roma
Juventus 0 - 1 Inter Milan