Vawiin aṭangin district volleyball inelna

Mizoram Volleyball Association (MVA) buatsaih, district hrang hrang inelna lian - 18th MVA Inter District Volleyball Championship 2022 chu vawiin aṭangin Hnahthialah khelh a ni dawn a, nizan khan GSA Hall Electric Veng, Hnahthialah 'Spike Off' a ni.

Ni nga chhung awh tur volleyball inelnaah hian mipa team 10 an tel dawn - district 11 zingah Siaha an inlan thei dawn lo. Hmeichhe inelna lamah pawh Siaha leh Mamit an inlan theih loh avangin team pakua an inel thung ang.

Inelna neih hnuhnung ber khan Saitual chu mipa leh hmeichhe huangah an champion. Zuchhip Volleyball Court, Khawzawla inelna neihah an chungnung hle, kuminah pawh champion tura rinkai an ni leh dawn.

Saitual manager Lalruatsaka chuan, "Hri leng vangin inbuatsaihna chu duhthusam a ni chiah lo, mahse kan inbuatsiah ṭha thawkhat. Champion team player kha an la kim deuh vek thei a, kuminah pawh beisei kan nei sang," tiin Vanglaini a hrilh.