Sevilla ngamtu Barca beiseina a sang

Xavi awm hnuah Barcelona-in harhtharna an chan chhunzawm zel - Pathianni zan khan an mikhual Sevilla chu 1-0 in an hneh a, La Liga table-ah pahnihna an ni ta.

Barcelona tan rawlthar duhawm Pedri chuan a thiam thil pholangin goal awmchhun a khung a, champion tum Sevilla-in a chhanletna tur an neih loh avangin Barcelona an chak.

Catalan club hian point 12 ngawtin hmahruaitu Real Madrid an la thlau a, mahse, an hmelma club ai hian match khatin an khel tlem zawk - Barca tan beisei a la awm e!

Hetihlai hian Real Betis chuan an mikhual Osasuna chu 4-1 in an sawp ve bawk a, Champions League khelh beiseina an chhi nung ve zel.

A hming Pedri
Barcelona-in palina dinhmun luah chungin Sevilla an mikhual a, an tlawm chuan an tan a pawi thui thei dawn tih an hre sa - mahse, first half chhungin goal an khung lo.

Xavi nauten Ronald Koeman hnuaia an neih loh pakhat an nei tawh a, chu chu chak duhna thinlung a ni. Sevilla lakah goal khung lawk lo mah se an beidawng lo a, minute 72-naah an hlawh chhuak ta nge nge.

Tun hnaia form tak Ousmane Dembele chuan penalty box pawna awm Pedri a hmu a, Spanish midfielder hi ball a pe. Kum 19 mi midfielder hian Sevilla defender pahnih a bum hnuah ṭha zetin a pet a, a goal mawi hle.

Barca boss Xavi chuan, "Kum 19 mi chauh a ni a, tun nen mah khaikhin a rem lo," tiin a player ṭha bik a fak - inkhelh hmaa palina Barca hi pahnihna an ni a, pahnihna Sevilla kha palina an ni ta thung!

Barca an vannei
Xavi leh a nauten league match 14 zet a zawnin tlawm an nei ta lo a, hetih chhung hian vawi li chiah an khingpui inhnehtawkpuiin, vawi 10 an chak - December 4-a Real Betis laka an tlawm hnuah an tlawm leh tawh lo.

Mahse, Barcelona-in fak an phu rualin Sevilla laka an vanneihna erawh sawi hmaih theih a ni lo. Manchester United aṭanga Sevilla-a loan-a khel Anthony Martial-a shot chuan Ronald Araujo kut a fuh a, Sevilla-in penalty beisei mah se referee-in ngaihdan dang a nei.

Barca defender Gerard Pique-a'n hnawhchhuah a tawk lo chu a vannei viau bawk - Sevilla right back Jesus Corona chu goal khung thei dinhmunah a ding a, mahse, goal hmaa tlan fal tur player hi Pique chuan a pawt.

Referee-in Pique hi a chet dan avangin yellow card bak a pe lo a, a vannei takzet - Spanish defender hian goal khungna chance a nei bawk a, mahse, post a tih per.

Xavi a ropui
Barca vanneih thu kan sawi a, Xavi hnathawh sawi hmaih a rem chuang lo - Barcelona a rawn enkawl tirh khan La Liga-ah pakuana an ni a, tunah chuan pahnihna an ni ta!

Barca legend hnathawh a ropui takzet a, thlasik transfer a hman ṭhat rah a tel, tiin a sawi theih bawk. Xavi chuan, "A êng zawnga thil thlir ṭhin mi ka ni a, thawhrimna, beih hram hramna, inpekna leh thawhhona ngai pawimawh mi ka ni.

"Kan khel ṭha a, kan inthlawp tlat a, kan vaiin kan tlan taimain kan nawr na hle bawk - heng zawng zawng hi innghah nana kan hman reng chuan result nei tur kan ni reng a, tun season-a kan hun tawn duhawm kan tawng mek a ni," a ti.

Xavi chuan sawi zawmin,"1-0 aia tam zawka chak thei pawh kan ni a, mahse, thutlukna kan siam har hret ṭhin - point ruk kan hlawh chhuak a ni," a ti a, elpui team hneh chu point ruk hlawhna a nih thu a sawi.

Hmabak chu
Barcelona-in Ningani zan dar 12:30-ah Europa League quarterfinal first leg khel turin Eintracht Frankfurt an lenchilh dawn - league lamah match kua khelh tur an la hmabak bawk a, mahse, Real Sociedad leh Real Betis tih loh chu inkhel harsa tia sawi tur an nei ta meuh lo.

Real erawh Thawhlehni zan dar 12:30-ah Champions League quarterfinal first leg khel turin an inlan dawn a, Chelsea an mikhual ang - Barca inkhel aiin a harsa dawn tih a chiang.

Hei chauh a ni lo - league match riat khelh tur an la neihah Sevilla, Atletico Madrid leh Real Betis an la hmachhawn dawn a, chesual thei dinhmunah an la ding reng.

Betis hi Manuel Pellegrini enkawlna hnuaiah an vul hle - Juanmi goal hnih, William Carvalho leh Álex Moreno goal khat ve ve khung hmangin Osasuna chu 4-1 in an hneh a, Osasuna tana Ante Budimir goal khungin awmzia a nei thui lo. Betis hi Real leh Barca tan point hloh theih ve vena tur a ni ang.