Mizoramin Tamil Nadu leh Uttarakhand an ngam lo

71st Sr. National Basketball Championship 2022-ah Mizoramin match hmasa pahnihah Uttarakhand leh inelna thlengtu Tamil Nadu an hneh lo. Vawiin tlai dar 5:00 hian group match hnuhnung berah Delhi an hmachhawn ang.

Inelna hi Chennai-ah neih a ni a, Mizoramin Pathianni zan khan Utta-rakhand an hmachhawn. Mizoram hi NorthEast champion ni mah se Uttarakhand an el pha lo.

First quarter-ah Uttarakhand 19-16 in an chungnung hret a, halftime-ah 34-25 an ni tawh. Quarter hnuhnung pahnihah pawh Uttarakhand bawk an chungnung a, 74-46 in an chak.

Uttarakhand player-te hi Mizo aiin an sang zawk a ni ringawt lo a, technique an nei ṭha zawk. Baller tana pawimawh shooting leh lay up ah Uttarkhand player an ṭha zawk a, defending leh attacking-ah pawh Mizoramin an tluk lo.

Nimin chawhma khan Mizoramin inelna thlengtu Tamil Nadu nen an inkhel zui a, sulhnu nei ṭha zawk Tamil Nadu kawng engkimah a chungnung. Tamil Nadu-in 90-50 in hnehna an chang a, Mizoram tan inzir tur a la tam hle.

Chutihrualin Mizoram tan Sr. National Basketball Championship final round thlen ringawt hi hlawhtlinna a ni tawh hrim hrim a, NorthEast champion ni tur hian Assam an hneh tih hriat a ṭha bawk.