Netherlands boss LVG a cancer

Dutch coach ropui Louis van Gaal chuan ṭhal be cancer a neih thu a puang a, Manchester United boss hlui hian Dutch TV programme Humberto-ah cancer a neih thu hi a puang a ni.

Kum 70 mi LVG chuan, "International break lai khan ka player-te ka hrilh duh lo, ka hrilh chuan an inkhelah nghawng a neih ka hlau a ni," a ti a, a cancer thu a tira a zep chhan a sawi.

LVG hian 2000-01 inkar khan Netherlands a lo enkawl tawh a, 2012-14 khan enkawl lehin, tun hi an ram team a enkawl ṭum thumna a ni - World Cup 2014-ah khan pathumna a nihpui.

Dutch coach chuan, "National team enkawl hna thawk chungin, zanah player-te hriat lohin damdawi in ka pan fo ṭhin a, dam ṭha emaw ka intih lai khan a lo ni si lo," a ti a, "Ka natna ang nei zinga 90% chuan he natna hi an thihpui lo," tiin a hlauhthawn loh thu a sawi zui.

LVG hian Ajax aṭanga a coaching career ṭanin Dutch league-ah vawi thum a champion pui a, Dutch Cup (1), Champions League (1), UEFA Cup (1), UEFA Super Cup (1) leh Intercontinental Cup (1) ah te a champion pui bawk.

Ajax aṭang hian Barcelona panin, La Liga nomawi pahnih, Copa del Rey (1) leh UEFA Super Cup (1) ah a champion pui a, AZ Alkmaar chu Dutch league-a a champion pui hnuin Bayern Munich a pan zui.

German club hi 2009-10 season-ah Bundesliga, German Cup leh German Super Cup nomawi a chawipui vek a, Champions League final-ah an chak lo thung.

July 2014 khan Manchester United a zawm a, boruak nei lian viau mah se FA Cup-a a champion pui tih loh chu English club-ah chhuan tur a nei lo.

LVG hian ama chanchin, 'LOUIS' tih hming chawia film an siam tih larnaah a cancer thu hi a sawi a, LVG chuan, "Damlohna tam tak ka paltlang a, ka nupui ngei pawhin chutiang chu a tawng. Mahse, chu chu hringnunin a ken tel ve reng a ni a, ka hun tawn tam tak avang hian ka nun chu a hausa zual sawt a ni," a ti.

Dutch coach ropui hian 1994 khan a nupui hmasa zawk Fernanda Obbes chu thin leh rilbawh cancer vangin a lo chân tawh.

Van Gaal hian Qatar-a World Cup khelh turah Netherlands a kaihruai dawn a, Qatar-in World Cup a thleng tur hi na taka sawiselin, "Thutlukna âtthlak tak a ni," a ti a, FIFA chu, "Sum chauh ngaihtuah," tiin a khak bawk.

Hetihlai hian Manchester United, Barcelona leh Bayern Munich-te chuan an coach hlui LVG chu dam thuai tura an duh thu social media kaltlangin an puang.