Lampard enkawl Everton an buai zel
Danglamna beiseiin Frank Lampard an lalut a, mahse Everton hi an result a chhe zual sauh emawni tih mai tur a ni. Pathianni zan Premier League inkhelah West Ham chuan Toffees hi 2-1 in an hneh.
Inkhel dangah Tottenham chuan Newcastle United 5-1 in an sawp. Antonio Conte-a'n a enkawl chinah Spurs hian a vawi khat nan palina dinhmun an luah, palina an nih dan erawh a la nghet lo - nizana inlan Arsenal-in point an hmuh hrim hrim chuan a lehpel leh nghal ang.
Chak thei lo
Aaron Cresswell-a freekick a mawi a, England goalkeeper Jordan Pickford tan dan ngaihna a awm lo. Mason Holgate hmangin an sut a, mahse beiseina an neih san lai takin Jarrod Bowen an veng thei lo.
Goal hnih an chhuah a, thawh chhuah a huphurhawm. Goal mamawh zawk an nih lai takin captain Michael Keane chuan yellow card pahnihna a hmu a, hnawh chhuah a ni. Minute 25 chhung chu a ṭhiante kim loa khel turin a chhuahsan.
Hammers tan erawh goal khung belh kher loin point thum a hmuh theih tawh, harsa lutuk loin hnehna an chang. David Moyes-a naute hian point 51 an hmu a, parukna dinhmun an luah. Palina Spurs an phak lohna chu point thum chauh a ni.
Chak a ngai
Everton hi relegation zone aṭanga an himna chu point thum chauh a ni, khelh hmabak match 10 a la nei. An la hmachhawn leh tur zingah - Manchester United, Leicester City, Liverpool, Chelsea leh Arsenal te te an la tel; a awlsam dawn lo.
Lampard chuan, "Kan dinhmun kan hrechiang, khelh hmabak 10 la awmah thapui kan thawh tur a ni. Beiseina leh rinna kan nei a, theihna kan nei a ni tih hi a taka kan lantir a ngai, tun aia sang hi chu thleng thei tur kan ni.
"Everton hian sulhnu ropui a nei a, min thlawp tlattu fans an awm bawk. Keimah chauh ni loin player zawng zawng pawhin theihtawp an chhuah a ngai," tiin a sawi a, inhamtan theih ngei a inbeisei. Everton tan EPL khelh zui hram tum hi season tira an duhthusam chu a ni lo ang.
Palina Spurs
Goal an phurh hmasak hnuah Tottenham chu ropui takin an tho chhuak. Captain Harry Kane-a'n goal khung lo mah se - Ben Davies, Matt Doherty, Son Heung-min, Emerson Royal leh Steven Bergwijn ten goal khat ṭheuh an khung.
Spurs hi season tir lamah an che fuh rei lo, manager thar Conte an neih hnuah pawh hma an sawn hleithei lo. Mahse, January bazar an hmang ṭha a, player thar Dejan Kulusevski-a'n boruak a siam danglam nasa, Magpies lakah pawh assist a nei leh a ni.
Rodrigo Bentancur pawh midfield lailum luahtu a ni a, ball semtu pawimawh a ni - 90% ngawt a pass dik. North London club hian Champions League khelh an beiseina a sang, chutih rualin an elpui Arsenal chetsual an chan tel a ngai tawh.