West Bengal hmaah Mizoram

National Junior Football Championship 2018, Cuttack-ah vawiin chawhma dar 10:00 hian Mizoramin semifinal-ah West Bengal an hmachhawn dawn. Nimin khan Punjab final lut turin Odhisa 3-0 in an hneh.

Mizoram coach Lalremtluanga chuan, "West Bengal leh Jharkhand inkhelh ṭum kan en a, 1-1 in an inhnehtawk. Punjab-in Odhisa an hneh ṭum kan en bawk a, kan hmuh dan chuan West Bengal hi an ṭha ber. Bengal hi kan hneh thei a nih chuan final chu awlsam tur zawka ngaih a ni a, tunah erawh semifinal chuan kan ngaihtuah a ngai thung," tiin final chu hnai tak ni siin a la hlat thu a sawi.

Mizoram hian semifinal lut tur hian group stage-ah Uttarakhand (5-0) leh Chattisgarh (7-0) te an hneh hnuah Kerala nen 1-1 in an inhnehtawk. West Bengal nen hian team tana goal li khung tawh leh team tana goal khung tam ber ni mek HP Lalremruata chu hrem vangin a khel thei dawn lo a, captain Emmanuel Lalchhanchhuaha a rawn let dawn thung.

Coach RT-a chuan, "Inkhelh hun chawhmaa an sawn chhan hi khua la lum vang a ni a, kan player zingah phai rama tawnhriat nei an awm ve nual avangin khaw lum vanga buaina kan neih loh ka beisei. Final luh turin theihna zawng zawng kan chhuah dawn a, ṭawngṭaina lama Mizo mipui ṭawiawmna kan ngen," tiin Vanglaini a hrilh. Mizoram hian nimin tlai khan training an nei a, set piece bakah recovery an nei a ni.