A hming chu Suarez - Denis Suarez
Barcelona-in Copa del Rey last 16 an luh theih nana goal hnih khungtu chu Suarez a ni a, tun ṭumah erawh 'Luis' niloin 'Denis' zawk a ni.
Catalan club hian Copa del Rey-a a thiam 16 zinga inhlangkai tur hian Cultural Leonesa chu 4-1 in an hneh a, Suarez bakah hian Munir El Haddadi leh Malcom te chuan goal khat ve ve an thawh bawk.
Copa del Rey champion lai Barca hian first leg-ah 1-0 in third division club hi an lo hneh tawh a, inkhel pahnih belhkhawmah 5-1 in hnehna an chang a, round of 16 an lut chiang hle.
Nilaini zana club lian inlan zingah Atletico Madrid chuan hnehna chang turin harsatna an tawk lo a, inkhel hmasaa 1-0 a an hneh tawh sa Sant Andreu chu 4-0 a sawpin last 16 an lut ve bawk.
Suarez dang
'Barcelona tan Suarez-a'n goal a khung' tia sawi a nih chuan khawvelin Luis Suarez a mithhla nghal ṭhin a, Suarez tih chu Uruguayan striker kohna bik ni awm maiin a inhmeh 'bik' tawh.
Nilaini zana Suarez erawh Luis anga hriat hlawh lo Denis Suarez a ni a, tun season-a match riat chiah la inlan midfielder hian minute 20 leh 70-naah goal a khung a, a goal hnihna hi Barcelona senior team tana a match hmasa ber kheltu kum 19 mi Riqui Puig siamsak a ni.
Barca tan hian Munir El Haddadi chuan minute 18-na lekah goal hmahruai a khung a, Malcom chuan minute 43-naah a chhunzawm ve leh bawk. Barca tana a goal hnihna chauh a ni. Barcelona tana assist vawi thum neitu Ivan Rakitic hming lam hmaih a thiang lo bawk - khelmualah minute 45 chiah hun a hmang!
Cultural Leonesa tan Sene chuan minute 54-naah si phurh rawn sut ṭhen mah se Nou Camp-a tho chhuak tur khawpin an ṭha tawk lo a, mikhual team hi 1-4 in an tlawm.
Lawm a kim lo
Barca tana goal khat khungtu Malcom chu hun tawp hnaih lamah hliam vangin lakchhuah a ngai a, nipui transfer-a Roma hnara Barca pantu forward hi mittui nen a chhuak a, Nou Camp-ah fan-ten ding chungin zahna an lantir.
Spanish champion chuan an player chungchangah hian thuchhuah siam nghalin engtia rei nge a chawlh dawn an la hriat theih loh thu an sawi a, he thuziak i chhiar meuh chuan a chiang tawh mai thei bawk.
Barcelona hian hliam vangin Luis Suarez, Samuel Umtiti, Sergi Roberto leh Rafinha te an chhawr thei lo mek a, an dawmdawi In lun lai taka Malcom inhliam hi pawi an ti khawp ang.
Brazilian forward lakchhuah a nih lai hian Barca hian an substitution neih chu an hmang zo tawh a, kim lo chungin hun tawp an khar a ngaih phah.
Simeone = 400
Atletico Madrid coach Diego Simeone chuan a vawi 400 nan Madrid khaw club a kaihruai a, Nilaini zan Copa del Rey inkhelah Sant Andreu chu 4-0 a sawpin a match 400 kaihhruaina hi chak result-in player-ten an lawm sak.
Argentine coach hi a career-a hun pawimawhah technical area-ah erawh a awm a rem lo thung. Season hmasa Copa del Rey-a a chet dan avanga match thum chhung bench-a ṭhut phal sak a nih lohna chu a tawrh chhunzawm a, mipui zing aṭangin inkhel hi a en.
Atletico hian goal li ngawt an khung chungin goal khung tur hian second half an nghah thlen a ngai a, danglamna thlentu pawh bench aṭanga luhtir Thomas Lemar a ni.
Kum 23 mi midfielder hian minute 48-naah goal hmahruai a khung a, Nikola Kalinic, Angel Correa leh Vitolo ten goal khat ṭheuh khung ve bawkin fourth division club Sant Andreu tan thawh ngaihna a awm lo.
Copa del Rey - Round of 32
Atlético Madrid 4 - 0 (5-0 agg.) Sant Andreu
Girona 2 - 1 (4-3 agg.) Deportivo Alavés
Sevilla 1 - 0 (1-0 agg.) Villanovense
Villarreal 8 - 0 (11-3 agg.) Almería
Real Sociedad 2 - 0 (3-1 agg.) Celta de Vigo
Barcelona 4 - 1 (5-1 agg.) Cultural Leonesa
Real Valladolid 2 - 1 (4-2 agg.) Mallorca