City leh Pep-a te chungah ka lawm - Silva

Manchester City midfielder David Silva chuan season liam ta kha a fapa damlohna avanga rilru pek a harsat thu a sawi a, manager Pep Guardiola, a khelhpui leh club thuneitu te ṭawiawmnaah a lawm takzet thu a sawi.

Spanish midfielder hian kum 2010 khan Valencia aṭangin City hi a zawm a, Premier League match 262 a khelh tawha a goal leh assists belhkhawm chu 130 a tling. Amaherawhchu nikum khan a nupui Yessica nena an fa Mateo chu a pian hun hma thla thuma zaichhuah a nih avangin enkawl uluk a ṭul a, hei vang hian City match riatah a inlan theih loh phah.

Silva chuan, "Ka nun harsat lai ber a ni a, ka haw apiangin ka nupui nen damdawi inah Mateo kan awm pui chawt a. Ka nupui leh ka fapa zawng chu ka ngaihtuahnaah a awm a, thil ka ei mumal lo a, kar khatah vawi khat chauh training ka nei bawk," tiin hun harsa tak a hmachhawn thu a sawi.

City midfielder hian sawi chhunzawmin, "Pep Guardiola, ka khelhpui leh club ten min hrethiam a, an chungah bat nasat tak ka nei a ni. Manchester lamah ka rilru a awm thei lo tih Pep-a'n a hrethiam a, kan vai ṭhat tlanna turin ka chhungte bula awm min phalsak. Anni zarah ka hrehawm tawrh pawh nasa takin min chhawk zâng khai a ni," tiin a sawi.