PSG an chak zo lo

French champion Paris St-Germain chuan Nilaini zan khan hnehna an chang zo lo. Thomas Tuchel-a naute hi tun season chunga a vawi khat nan an chak lo dawn nia a lan hnuin Strasbourg nen 1-1 in an inhnehtawk.

PSG hian an match hmasa 14-ah hnehna an chang a, tun hnaiah erawh a zawnin vawi hnih an chak zo lo. Strasbourg tan Kenny Lala chuan minute 40-naah penalty aṭangin goal hmahruai a khung, Paris club lam tan substitute Kylian Mbappe-a penalty hlawhchhuah chu Edinson Cavani-a'n an si phurh sut nan a khung a ni.

Footballer manto ber Ney­mar chu khel bawr na vangin a inlan thei lo a, tun hnaiah match an ngah avangin Mbappe pawh bench-ah hun hman hmasak tir a ni - chak zo lo mah se season tir lam league match 16 chhung tlawm loa kal tluan hi an club tan record thar a nih chhunzawm zel.

PSG winger Julian Draxler chuan, "Kan tan chuan match ṭha tak a ni lo, kan khingpui te khan an khel ṭhain point hmuh kha an phu. Tun hnaiah match kan khel hnem a, a zawna league match hnih chhung hnehna chan zawh loh hi chu a ṭha lo hle. Red Star Belgrade nen Champions League kan khelh hunah chuan result ṭha zawk kan neih theih tawh ka beisei," tiin a sawi.

Inkhel dangah tun hnaia khel ṭha tluang tak Lyon chu an mikhual Rennes lakah 2-0 in an tlawm, winger Hatem Ben Arfa chuan a club hlui lakah goal a khung a, striker Jordan Siebatcheu chuan an chak a nemnghet bawk.

Lyon hi table-ah palina an ni mek a, an chunga awm Montpellier leh Lille te hi point khat leh point hnih chauha an phak loh avangin a sang thei ang bera season khar turin an dinhmun a la chhe lo.