Junior football-ah Mizoramin final an lut

National Junior Football Championship (BC Roy Trophy) 2018, Cuttack-ah Mizoram chuan nimin khan semifinal-ah West Bengal chu hun pangngaia 1-1 a an inhnehtawk pui hnuin extra time khelh zawhah 4-1 in an hneh.

December 9, Pathianni tlai dar 2:00 hian final-ah Punjab an hmachhawn ang.

1-1 a ni phawt
Mizoram leh West Bengal khelh dan hmang a inang a, ball vawrh luah luah kalsanin ground ball ve ve hmangin an khel a, an inkhel tawk nghal hle.

Amaherawhchu minute 10-na lekah Mizoramin offside trap siam fuha an inngaih chu assistant referee-in a phar sak si loh avangin West Bengal-in an hmang ṭangkai a, goal an khung hmasa a, goal venhim hna an thawk zui nghal.

Mizoram an tumah an chiang a, an khelh dan ngaia khelin minute 20-naah Lalremruata hmangin an si phurh an sut. Khawruhlian rawlthar Remruata hi left back ni mah se corner ding lam pettu atan an hmang a, a vawi khat pet chu West Bengal keeper-in hnek chhuak mah se a per chu Remruata zawnah bawk tlain box pawn aṭangin a hlai lut.

West Bengal-in goal venhim tumin ṭan an la a, Mizoramin goal khung tumin an nawr bet. Ramhlun Vengthar rawlthar Lahmingchhuanga Hauhnar-in yard 30 aṭanga a chance neih chu goal-ah a chantir thei lo. Zanlawn rawlthar Lalmuanpuia pawhin hnai tak aṭangin a tauh lut lo a, hun pangngaiah goal a luh belh lo.

Mizo an dingchang
Extra time-ah Mizoram coach Lalrem-tluanga'n John Lalmuanpuia a luhtir a, West Bengal lamin penalty shootout beiseiin keeper an thlak thung. West Bengal-in goal venhim an tum lutuk an tuar a, substitute John-a'n minute lina lekah goal a khung a, a ball vawi khat khawihna a ni!

Hun pek belh second half-ah West Bengal-in risk lain an rawn nawr a, Mizoramin remchangah lain an vaw let a, Hmingchhuanga'n ṭha taka lalutin keeper chiah a hmachhawn hnuah chiang zetin a khung. Minute 115-naah John-a bawk a rawn lang a, Serchhip rawlthar hian chak nemnghehna goal a khung.

Mizoram daltu Punjab?
Mizoram hi kum 2013 khan Assam hnehin an champion a, he mi hnu hian final ṭum hnih thleng lehin Punjab lakah an chak lo ve ve. Kum 2016 khan tun ṭuma coach Lalremtluanga kaihhruaina hnuaiah Mizoram hian final an thleng a, Punjab nen hun pangngaiah 1-1 a inhnehtawkin penalty shootout-ah an chak lo.

Kum 2017-ah Mizoramin final an thleng leh a, Chhattisgarh-a inelna neihah hian Punjab bawk hmachhawnin hun pangngaiah goal a lut lo a, khaw lum hnuaia extra time-ah Mizoram 3-0 in a chak lo. Nikum hian inelna hi vawi hnih neih a ni a, Mizoram hian SAI leh Tamil Nadu hneh mah se Uttar Pradesh hneh loin group stage-ah an tla a, UP hi an champion zui bawk.

BC Roy Trophy-ah Punjab-in Mizoram nomawi chawi tur final-ahṭum hnih an chhuhsak a, hei chauh hi ni loin kum 2015 khan Santosh Trophy-a a zawna champion tum Mizoram chu semifinal-ah hneh bawk. Mizoram hian kuminah Santosh Trophy group stage-ah Punjab hi an hneh a, junior team pawhin senior team hnung zui hi an tum ngei ang.

Nomawi kan lak theih kan beisei - Mizoram coach
Coach Lalremtluanga hian a vawi thum nan Mizoram junior team a kaihruai a, tun ṭumah hian champion theihna hun ṭha an nei.

Mizoram coach chuan, "Ṭum thum ka hruai tawh zingah tun ṭum baka inbuatsaihna hun ṭha hi kan nei lo a, nomawi kan hawn theih ngei pawh ka beisei a. MFA duhsakna ka dawng leh hi ka lawm hle a ni," tiin Vanglaini a hrilh.

Team chungchang sawiin RT-a chuan, "Semifinal-a kan khelh dan a lungawi thlak a, final-ah chuan captain Emmanuel Lalchhanchhuaha a tel thei tawh bawk a, kan inringtawk hle. Punjab-in final thleng tura inelna thlengtu Odisha 3-0 a an hneh ṭum kha ka en a, ka sawi tawh angin West Bengal aiin a awlsam zawk ka beisei a, chutih rualin engpawh a thleng thei a ni," tiin team ṭha zawka a inngaih thu a sawi.

Mizoram hian final thleng turin match li an khel a, goal 17 khungin player 10 in goal an khung tawh a, kil tin aṭangin an khung thei tihna a ni. Mizoram manager Vanlalchhuana chuan, "Team kan inlungrual em em a, kan thawhhona a ṭha. Champion tumin theihtawp kan chhuah a, Mizo mipuite kan tana min ṭawngṭai turin kan ngen tak meuh meuh a ni," tiin a sawi.

Final Kalkawng
Group Stage
December 1, Inrinni
Mizoram 5 - 0 Uttarakhand
MIZ : Emmanuel Lalchhanchhuaha 5';
Lalhmingchhuanga Hauhnar 30'; Lalhruaipuia 45'; R. Lalhmingmawia 65' (P); John Lalmuanpuia 90'
December 3, Thawhṭanni
Mizoram 7 - 0 Chattisgarh
MIZ : Lalmuanpuia 10'; HP Lalremruata 21', 65', 69'; Lalnunzira 55'; Jefrey Lalmalsawma 89'; Lalhruaipuia 90'
December 5, Nilaini
Mizoram 1 - 1 Kerala
MIZ : HP Lalremruata 65'
Semifinal
December 7, Zirtawpni
Mizoram 4 - 1 West Bengal
MIZ : Lalremruata 20'; John Lalmuanpuia 94', 115'; Lalhmingchhuanga Hauhnar 108'