Aizawl FC-in Churchill tlawh dawn

Pathianni tlai dar 5:00 hian Tilak Maidan, Goa-ah Aizawl FC-in Churchill Brothers an hmachhawn dawn. Mizo club hian an match hnuhnung bera Real Kashmir an hneh loh avangin match sarih khelhah point nga hmuin club 11 inelnaah pakuanaah an awm mek.

Eng nge fuh lo?

Aizawl FC hian RG Stadium-a East Bengal an hneh hnuin MPL semifinal-ah Mizoram Police an hneh leh a, a zawna vawi thum an chak hnuah Real Kashmir an tlawh.

Gift Raikhan-a hote an mikhualna hmun Srinagar-ah an khel ṭha a, goal an khung theih loh avang leh set piece aṭanga goal an chhuah leh avangin point an hlawh chhuak zo lo.

Manipur coach Gift hian Mizo player ṭhahnem tak a nei a, player khelh dan hmang leh rilru put hmang inang lo tak tak an nih hlawm avangin khingpui mila player thlan dan tur a la hre fuh tawk lo niin a lang.

Aizawl FC coach hian I League an khelh hnuah MPL-ah team ṭha lo zawka ngaih a chhawr a, a duh duh a thlan lai aiin result an nei ṭha zawk. Hei bakah hian I League bika an chet ṭhat loh chhan hi foreign player-te chet ṭhat loh vangah a ngaih theih bawk.

Gift-a thukhawchang

I League best coach ni lai Gift chuan, "Football-ah chuan khel ṭha emaw ṭha lo emaw a pawimawh ber chu chak a ni a, kan chak loh chuan rilru hi a hrehawm em em a ni. Result ṭha kan neih loh avangin club leh Mizo mipui chungah ngaihdam ka dil a, Churchill lakah hnehna chan ngei ka duh," tiin Vanglaini a hrilh.

Mizo club khingpui tur Churchill Brothers hian tun season match rukah hneh loh an la tawng lo a, an khingpui vawi li an inhnehtawk pui tawh thung. Goan club forward Willis Plaza a che ṭha em em a, East Bengal forward hlui hian match hnuhnung pathumah goal ruk a khung avangin Aizawl FC tan point hlawhchhuah a awlsam lo ang.