Ramhlun North-in MPL khel zel dawn

Mizoram Premier League Season 8 khel tur zawnna Playoff-ah nimin khan Ramhlun North-in Kanan FC chu second leg-ah 2-1 in an hneh a, first leg-a an inkhelhna nen belhkhawmin 5-2 in an chak.

Lammuala inkhelah hian Ramhlun North bawk an chungnung a, first half-ah goal lut lo mah se second half-ah Lalliansanga leh Lalnunzira te goal hmangin 2-0 in hma an hruai. Away goal rule hman a nih dawn avangin Kanan FC tan MPL khel turin goal li khung a ngai a, Aizawl DFA hnuaia club tan a harsa tawh.

First division finalist Kanan hian C. Lalmuanpuia hmangin minute 89-naah goal an khung a, he goal hi inkhel thlak danglamtu ni loin scoreline timawitu chauh a ni.

Ramhlun North-in season tharah Mizorama inlena sang ber an khel leh dawn a, inelna hmachhawn tur team pariat a chiang chiah bawk. Team paruk chu MPL7-a inlan sa Chhinga Veng FC, Aizawl FC, Mizoram Police, Chanmari FC, Electric Veng FC leh Chawnpui FC te an ni ang a, relegate ta Bethlehem Vengthlang aiah qualifier champion FC Venghnuai an inlan ang.

Ramhlun North secretary K. Lalenghluna (Menga) chuan, "Tun season-ah sponsor kan hmu ṭha a, sum pawh kan seng nasa. Amaherawhchu coach tura kan lak Samson Ramengmawia'n AIFF development officer hna a hmuh avangin enkawltu mumal kan neih loh kan tuar a ni. Season thara hma kan lak dan tur ka la hre lo a, team ṭha tak chu kan din leh thei ngei ka beisei," tiin Vanglaini a hrilh.

MPL Playoff
Leg 1 - December 4, Thawhlehni
Ramhlun North FC 3 -1 Kanan FC
RNFC : Jessy Vanlalmuana 7', 41'; Lalliansanga 21'
KFC : Lalbiaknia Royte 71'
Leg 2 - December 7, Zirtawpni
Kanan FC 1 - 2 Ramhlun North
KFC : C. Lalmuanpuia 89'
RNFC : Lalliansanga 65'; Lalnunzira 72'
Agg-ah Ramhlun North 5-2 in an chak