Chelsea tan nomawi beisei tawp zan?

Thinlung chhungril berin a beisei ngam chiah loh pawh ṭawngkam chuan beisei anga sawi a ngaih chang a awm. Zanin dar 11:00 hian Chelsea chuan Stamford Bridge-ah Manchester City an mikhual dawn a, Blues hi an chak lo a nih chuan Premier League nomawi an beiseina a chuai tawh hial mai thei - tuna an inthlauhna chu point 10 a ni.

Match hnuhnung bera Wolves an hneh loh hnuah Chelsea manager Maurizio Sarri chuan Manchester City nena khaikhin chi an la nih loh thu a sawi a, "Keini chuan a sang pali zinga tel kan tum," tiin a sawi tawh. Italian manager hian an mikhual tur City a chhaih nge an nihna tak a sawi tih chu hriat a ni rih lo.

A hmuhnawm dawn

Barcelona leh Bayern Munich a enkawl laia attacking game hmuhnawm lantir ṭhintu Pep Guardiola-a'n Man City a enkawl season hmasa berah a duh angin a khelh tir thei lo a, champion tho mah se a duhkhawp lo. A player neih sa a chher hriam bakah an mamawh a lakbelh zel.

Spanish manager hian tunah chuan a duh ang thlapin a khelh tir thei tawh, match 15 an khelh tawh chinah chak loh an la nei lo - anmahni ang thoa la tlawm lo Liverpool aiin point hnihin an sang mek; goal khung hnem ber niin a chhuah tlem pahnihna an ni bawk.

Antonio Conte-a'n Chelsea a champion pui a, mahse Italian manager hian rei a daih lo. Conte thlak turin a hnam pui Sarri bawk an lalut. Napoli manager hian khelh duh dan a nei a, hnai te tea rang tak taka ball an inpek theih nan a player mamawh a lei bawk; ball thiam club pahnih hian inkhel hmuhnawm an chhawp chhuak ngei ang.

An ṭha tlang

Pep Guardiola-a'n player ṭha a ngah a, match tin deuhthawah a siksawi ṭhin. Player inlan tur an chian loh lai pawha chiang awmchhun chu Fernandinho a ni. Brazilian midfielder hian tun season EPL match tinah bul a la ṭan vek a, ṭum hnih chiah thlak a la ni bawk.

Maurizio Sarri pawhin player hman thiam bik a nei, Napoli lam a hriat chian tawh Jorginho a lalut. Italian midfielder hian N’Golo Kante hnathawh ṭhin ang kha a rawn thawk a, France international hi holding midfielder atan hman a ni.

Fernandinho leh Jorginho te hi team tan an hnathawh a inang hle a, an ṭhiante angin langsar viau lo mah se an hnathawh hi a pawimawh takzet. Tlarhnung an puih bakah tlarhma an puih chang a awm, a hnung leh hma lam khaikhawmtu an ni. An pahnih zinga chefuh zawk hian inkhel result a siam danglam daih thei ang.

Mual sir lamah

Sergio Aguero-a'n hliam tenau vangin match hnuhnung pahnih a khel thei lo a, zaninah a inlan dawn em tih a la chiang lo. Argentine striker hi a awm a nih chuan Man City goal nawrna khawl ber a ni leh ang, a awm loh chuan Gabriel Jesus a inlan thung ang.

Guardiola-a'n mualsir lama chetla ṭhin player a hmang thiam a, Raheem Sterling leh Leroy Sane a neih sa bakah Riyad Mahrez an neih belh bawk. Anni pathum hi lut thei vek an ni a, lut lo thei vek an ni bawk! An zinga pahnih erawh an lut dawn tih a chiang, wing back hot bera sawi ngam Marcos Alonso hmaah eng anga ṭha nge an nih tih a lang dawn.

Nikum khan Chelsea hian Stamford Bridge-ah City 2-1 in an hneh a, an goal pahnih hi Eden Hazard khung a ni. Belgium international hian season duhawm a hmang chho leh mek a, Italian manager Sarri pawhin a chungah rinna nghatin a duh dan taka a tal a phalsak ṭhin.

Kum 27 mi Hazard dang tur hian Kyle Walker a awm dawn, English defender hi Tottenham lama puitling sa tawh a ni a, Pep-a enkawlna hnuaiah hma a sawn zual - player ṭha tak kha a tlanna bikah chuan 'ṭha bik' zinga sawi ngam a ni tawh. Hazard leh Walker inhmachhawn tur pawh hi a hmuhnawm ang.

A tha ber?

Manchester City player neih ṭhat zia sawi nawn a ngai lo a, squad insiksawi thei tura player an ngah tawk zia pawh hriat sa a ni. Chelsea manager Sarri pawhin Man City hi a dahsang thiam hle.

Kum 59 mi Sarri chuan, "City hi Europe team zinga ṭha ber an ni a, khawvel huap pawhin an ni hial ang. League bakah Champions League nomawi pawh an chawi theih ka ring, chutihrualin an hun tawn tura zir a ni ve ang. Nikum pawh khan team ṭha tak ni mah se UCL-ah khan match hnih an khelh fuh loh zeuh vangin an champion lo.

"Italy-ah khan point 91 kan hmu chungin kan champion lo a, Napoli kha Juventus hnuaiah kan awm a nih kha. Tawnhriat aṭanga chhut chuan match tinah hian point hmuh a pawimawh," a ti. Italian manager lian City chu team ṭha tak ni mah se point thum hmuh an tum thu thu khuh takin a sawi.