Armstrong chhungkua chhan chhuaktu Uber!

Cyclist ropui Lance Armstrong chuan damdawi hman phal loh hman chungchanga a buaina aṭangin Uber chuan a chhanhim thu a sawi a, "Kan chhungkaw chhan chhuaktu a ni," a ti!

Kum 47 mi, infiammi zinga ropui ber pawla chhal hi 2012 khan damdawi hman phal loh a hman avangin damchhung atan thirsakawr intlansiak lama inhmang thei lo tura hrem a ni.

He thil thleng avang hian Armstrong hi vawi tam court-ah a inlan a ngai a, sumdawnna lama a thawhpuite nen inremna tam tak a siam a ngai a, heng zawng zawng atan hian dollar maktaduai 111 vel zet a seng niin an sawi.

Mahse, American cyclist ropui hian a hunlaia hriat la hlawh lo tak Uber-ah a hausakna peipung turin sum thawh nachang a lo hre hlauh a, Uber aṭanga a hausakna hmang hian a sum insen tam tak a hliahkhuh!

Engtin maw?

Kum 2009 khan Uber hi din a ni a, transportation network company niin a sawifiah dan awlsam berah chuan phone hmanga taxi hman theihna leh food delivery hna thlenga thawk an ni.

Uber hi din a nih kumah hi chuan a company hlut zawng hi dollar maktaduai 3.7 a ni a, Armstrong hian a ṭhianpa leh sumdawng ni bawk Chris Sacca kaltlangin kum 2010 khan $100,000 chu Uber-ah hian pei pung turin a dah.

Armstrong midang kaltlanga sum hi pe a nih avangin Uber lamah a dah tih a hre lo a, kum 2018 a her chhuah meuh chuan kum 2009-a dollar maktaduai thum vel lek hlutna nei company hi dollar tluklehdingawn 72-a hlu a ni tawh!

Kum 2019-ah chuan Uber hlutna hi dollar tluklehdingawn 120-ah kai chho tura ngaih a ni a, a tira sum a thawh tih pawh inhre lo Armstrong tan chuan amah chhan chhuaktu a ni ta.

A pung thur thur

"A nei apiang pek belh an ni ang," tih ang mai khan Uber hausakna a pun rualin Armstrong-a hausakna nasa takin a pung a, a punna zat tak sawi duh lo mah se dollar maktaduai tel takmeuh a ni tih erawh a chiang.

Armstrong hi,"Dollar maktaduai 10, 20, 30, 40 leh 50 zingah hian a khawi ber hi nge Uber aṭangin i lakluh?" tia zawh a ni a, "In number pek zinga a engemaw ber hi chu a ni," tih ngawtin a chhang!

Fa panga lai enkawl tur nei Armstrong chuan, "A dik tak ni tura ngaihtuah chuan a awihawm loh hial zawk a ni," tiin Uber-a a tih fuh chu a lawm thu a sawi.

Armstrong hian April khan a cycle khalh sak ṭhin, mipui sum hmanga din US Postal Service team a tih hmingchhiat avangin dollar maktaduai nga pek a lo remti tawh bawk a, legal fee zawng zawng nena a sum sen zat ngaihtuahin Uber lama a sum hmuh sawi nuam a ti viau hi a awm lo hran lo.

Thawnthu chu

Armstrong hi cycling khawvela inelna ngaihhlut hlawh ber Tour de France-ah kum 1999 -2005 chhung kha a zawnin vawi sarih a champion a, a chawlh hnuah kum 2009 khan lo kir lehin Tour de France-ah pathumna a ni lehnghal a, 2011 khan a vawi hnih nan a chawl.

Mahse, Armstrong hi US Anti-Doping Agency (USADA) chuan intihchakna damdawi a hmang tiin an puh a, Tour de France title a kawl lai pasarih chu hlihsak vek a ni zui.

Kum 2013 khan Armstrong hian damdawi a hman ngei thu a sawi a, mahse a damdawi hman ang hman chu infiamna khawvela thil thleng ṭhang ve reng a nih thu a sawi.

Armstrong chuan, "He damdawi hi chu mi zawng zawngin an hmang vek tih hi mipui tam zawkin an hria ang. Hun kha ko kir leh thei ta pawh ni ila, kha damdawi kha ka hmang nawn leh ang," tiin a damdawi hman chu a tihsual a nih loh thu a sawi.