Real tan goal khung a harsa lo

European champion Real Madrid-in Copa del Rey round of 32-ah goal khung turin harsatna an nei lo a, an mikhual Melilla chu 6-1 ngawtin an sawp.

Real Madrid tan Marco Asensio leh Isco ten goal hnih ve ve an khung a, Javi Sanchez leh Vinicius Junior ten goal khat ve ve thawh bawkin Melilla tana striker Yacine Qasmi khung chu mualpho zualpui khuhna chauh a ni.

Spanish club lian ten Copa del Rey last 16 an lut kim a, Real Madrid hma hian champion lai Barcelona leh Atletico Madrid te chu a thiam 16 zinga tel turin an lo inpetkai tawh bawk.

Squad a chhah

Real Madrid-in Pathianni zan dar 8:45-ah Huesca nen league match an khel dawn a, La Liga-a beisei phak lo Real boss Santiago Solari chuan hei hi rilruah dah ran chungin squad a siksawi.

Sergio Ramos, Gareth Bale, Luka Modric, Toni Kroos leh Karim Benzema te chu bench-ah takngial pawh hmuh tur an awm lo a, mahse hei tak hi Real squad chhah zia hrilhfiahna remchang a ni - starting XI-ah hian Spain international pali leh Champions League-a season thum chhung a zawna champion tawh goalkeeper Keylor Navas te an la awm.

Player naupang zingah kum 19 mi Vinicius Junior te an la awm a, Brazilian forward hian a season khatnaah match khel tam nghal lo mah se pound maktaduai 30 chuang man a nih avangin namnul chi a ni lo.

Beisei ang result

Real Madrid-in league match hnuhnung bera Valencia 2-0 a an hnehna inkhel aṭangin player 10 ngawt siksawi mah se tarlan tawh angin an squad a chhah miau a, third division club laka an goal hmasa ber khung turin an nghah rei a ngai lo.

Asensio chuan minute 33-na lekah goal hmahruai a khung a, minute hnih hnuah a goal hnihna a khung zui. Real-in goal net awmna lai an hre laklawh - minute li a liam awrh a, Real tana a match hmasa berah Javi Sanchez chuan goal a rawn khung ve lehnghal.

Second half minute hnih­naah Isco chuan goal khat a rawn khung a, minute 83-naah a khung leh bawk. Isco goal hnih khung karah hian goal hnih a lut a, goal khat zawk hi pound maktaduai 39 man Vinicius khung a ni a, goal khat hi Melilla tana penalty aṭanga Qasmi khung a ni.

Beiseina thar nen

Real Madrid hian manager lailawk Santiago Solari hoa an match hmasa paliah hnehna an chan vek avangin Argentine coach hi a nghetin an lalut a, beiseina sang tak an neih laiin manager nghet a nih hnua an match hmasa berah Eibar chu 0-3 in an ngam lo.

Manager nghet atana lak hlim Solari tan bul ṭanna duhawm a ni lo. Mahse, Real hian match hnihnaah Champions League-ah AS Roma hmachhawnin 2-0 in an hneh a, league-ah Valencia chu 2-0 in an hneh leh bawk.

Ningani zanah Copa del Rey last 16 an lut chiang leh ta bawk a, Solari hnuaiah Real an talbuai dawn niin lang mah se an insiam ṭha leh rang hle. Zaninah pawh Huesca lakah chak an beisei ang.

Team dang

Real Madrid hma hian Barcelona leh Atletico Madrid chuan last 16 an lo lut chiang tawh bawk a, La Liga table lama inhlat lo tak pahnih hi zaninah league match khel turin an inlan ve ve dawn.

Atletico hian vawiin tlai dar 5:30-ah beisei phak baka season hmang ṭha Alaves an mikhual dawn a, Barcelona chuan Catalan derby khel turin zanin dar 1:15 hian Espanyol an lenchilh thung ang.

Tun season La Liga-ah bei­sei loh tak result a thleng ṭhin a, Atletico leh Barca hi chak chiang saa dah chi an ni ngawt bik lo - hei tak hi tun season La Liga ti ngaihnawmtu a ni.