Serena leh Wozniacki an kal zel

Serena Williams chuan ṭha takin season bul a ṭan chho mek a, inelna a hmachhawn hmasa ber WTA Auckland Classic-ah semifinal a inhlangkai ta. Caroline Wozniacki pawh a thiam pali zingah a in vaw kai ve bawk.

Nimina quarterfinal inkhelah Serena hian a khingpui Laura Siegemund chu darkar khat leh a chanve chhungin 6-4, 6-3 in a hneh. Set hmasa zawkah 4-4 ni thei mah se hun pawimawh laiah American star a che fuh a, set hnuhnungah pawh a dingchang zui.

Grand Slam vawi 23 champion tawh Serena chuan, "Ka hriselna a ṭha tawk a, ram kang vangin boruak chu duhthusam ni lo mah se match ṭha taka ka khelh theih avangin a lawmawm hle," tiin a sawi. Serena hian tun inelna a hmachhawn laia a thuamhnaw hak chu a hming ziak hnanin ramkang tuarte tana sum tuak nan a lilam ang.

Inkhel dangah world number 1 hlui Caroline Wozniacki chuan champion lai leh tun ṭuma seeded palina ni bawk Julia Goerges chu 6-1, 6-4 in a hneh a, final lut tur chuan Jessica Pegula a paltlang leh a ngai dawn a ni.

Seeded pangana Wozniacki hmachhawn tur Jessica Pegula a vannei, American nula hi Alize Cornet nen an intawng a, 6-0, 3-2 a hma a hruai laiin a khingpui hi malpui hliam vangin a khel zui thei lo.