Sulhnu ropui hnutchhiah tum Ralph

Southampton manager thar Ralph Hasenhuttl chuan Premier League-ah a hming hriatreng a nih tawh nan theihtawp chhuah a tum thu a sawi a, Saints tan hna ropui thawh a tum.

Relegation zone-a awm mek Southampton hian beisei ang result an neih theih loh avangin coach Mark Hughes chu an ban a, a hmun ruak luah turin Ralph Hasenhuttl hi an lalut a, coach thar hnuaia an match hmasa ber ni turin zanin dar 8:30-ah Cardiff City an lenchilh ang.

German club RB Leip­zig boss hlui chuan, "Pre­mier League-a miten min hriatreng tawh tura sulhnu hnutchhiah hi ka tum hmasa chu a ni. Germany-ah hun duhawm tak tak ka hmang a, ka tan chuan ṭawng dang daih hmanna hmuna team thar enkawl hi chona duhawm a ni," a ti.

Kum 51 mi Austrian manager hian RB Leipzig chu Bundesliga-a an season hmasa berah pahnihna a nihpui nghal a, Premier League-a a hna tur erawh Saints chhanhim a ni ang.