Patrick Vieira hmaah Arsenal an zawr
'Engahmah beisei tih san lutuk loh tur, kan beisei anga thil a thlen lohin kan na zual ṭhin,' tih thu ziak a awm. He thu hi Arsenal ṭantute tana phuah a ni mai thei, beiseina an neih san vanglai takin Patrick Vieira an ngam lo.
Mikel Arteta naute hi Crystal Palace chuan 3-0 in an lo sawp a, season thara Champions League khelh an tumna chu la nung reng mah se, an hmabak erawh a hautak dawn - an hmelma Tottenham hnuaiah an awm mek.
Thawhṭanni zan Selhurst Park-a inkhelah Palace tan tlarhmaa ding pathum - Jean-Philippe Mateta, Jordan Ayew leh Wilfried Zaha ten goal khat ṭheuh an khung a, mikhual team lamin a chhanletna tur an nei lo.
A bilh a tho lo
Khup hliam vangin Kieran Tierney a inlan thei lo, a hmun ruakah Nuno Tavares a luh a ngai. Portuguese defender hian freekick aṭanga ball kal a tauh chhuak ngam lo a, goal hmasa ber Mateta-a'n a khung dawnah a tih tur a ti tawk lo.
Minute 16-naah goal hmahruai a lut a, an insiamrem hman lo. Minute 24-na lekah Ayew chuan a kua a hre fuh laklawh - Tavares lamah bawk chak taka ball a lakluh hnuah chiang zetin a khung, keeper Aaron Ramsdale tan dan theih a ni lo.
Thomas Partey-a'n tihsual a ngah, ball a pe sual hnem. Ghana international midfielder hian Zaha a veng hneh lo bawk, hlauhawm takin a tlan tlangtir. Ivory Coast internatonal hian player pathum hual karah penalty a hlawh chhuak a, an goal thum nan a khung zui.
Arsenal an nawi
Arteta-a'n team nghet tak a din tawhah a inngai a ni mai thei, mahse an squad a pan em avangin chesual thei reng an ni tih erawh an hre thar nawn ang. Defender Tierney thlak zo an nei ṭha lo, second half-ah phei chuan Granit Xhaka pawh hnun a ngai hial.
Martin Odegaard-a'n ni dang a phak lo, a hun ṭha neihah a hlah bawk. Damkawr Bukayo Saka leh Emile Smith Rowe te intlan thelh vel ṭhin mah se a hmawr an bawk thei lo, bench aṭanga lut Eddie Nketiah-a'n boruak tidanglam mah se goal a keng tel lo.
TV lama commentator khan, "Tun season EPL-a a goal hmasa ber a khung teuh," tiin Nketiah-a'n bar a tih per khan a lo sawi, season tawp dawn tawh lamah Alexandre Lacazette thachhang dawltu berin goal a la khung lo tihna a ni a, khua a la var lo lam deuh a ni.
Chak phu zawk
Nikum October thla khan Crystal Palace hian Emirates Stadium an tlawh a, 2-1 a hma an hruai reng hnuah 2-2 in an inhnehtawk. Anmahni mualah chuan kawng engkima chungnung zawk ni chungin Vieira naute an chak, point thum hmuh phu zawkin an hmu.
Arsenal captain hlui Vieira chuan, "Match ṭhenkhatah chuan kan phu ang tawk point kan hmuh loh chang a awm, tun ṭumah chuan kan khelh ṭhat ang ngeiin result pawh a ṭha. Season kal laia kan khelh ṭhat ber ṭum chu a ni lo mai thei.
"Mahse a tir aṭanga a tawp thleng khan kan khel ṭha," a ti a, a naute khelh danah a lungawi hle. Palace hian an match hnuhnung 11-ah vawi khat chiah chak loh an nei, point 37 hmuin table-ah pakuana dinhmun an luah.
Insiamṭhat nghal a ngai - Arteta
Arsenal player zingah khel ṭha thlan chhuah tur an awm meuh lo, tihsual an ngahin goal hlauhawm pawh an insiam hleithei lo. Mikel Arteta chuan an chak lohna aṭanga insiamṭhat nghal an ngaih thu a sawi chhuak.
Gunners manager Arteta chuan, "Miin kan ṭhat tawk lohna lai an sawi hi kan pawm tur a ni. Kan tihsualte avangin ngaihdam kan ngai a, mahni in enlet chungin kan bei let tur a ni ang. A tir aṭang khan a fuh lo vel vek a ni ber.
"Inelna kan hmachhawn a nih chuan ball kan chuh tur a ni a, kan tihsual thup tumin tha kan thawh let tur pawh a ni. Tun aia nasa khan kan beih a ngai," tiin a naute a duhkhawp lo a, match an khelh leh hma ngeia siamṭhat a tum ang.
Arsenal hian Premier League match 29 aṭangin point 54 an hmu a, pangana niin an hmelma leh elpui Tottenham nen an point a inzat - Spurs aiin match khatin an khel tlem thung, palina nih leh nih loh chu an kuta innghat a la ni.