LVG tana khel tur Netherlands

Netherlands captain Virgil van Dijk chuan tun hnai lawka a cancer thu puangtu, an ram coach Louis van Gaal tan World Cup hriatreng tlak khelh a duh thu a sawi chhuak.

Kum 70 mi LVG hian Pathianni khan ṭhal be cancer a neih thu a puang a, football khawvel a barakhaih takzet. Kumin World Cup, Qatar-a khelh turah LVG hian Netherlands hi a kaihruai dawn.

Liverpool defender VVD chuan, "A tan kan awm reng dawn. A cancer thu a puan khan keipawhin mak ka ti a, interview a neih zawh khan message ka thawn nghal a ni.

"A natna rei tak a zep hian a nihna tak a pholang a, a bul ngeiah pawh ka sawi a, mi khawngaihna mamawh mi a ni lo. Hei hi a nih dan chu a ni mai," a ti.

Kum 70 mi coach hian 2000-01 inkar khan a vawi khat nan Netherlands a lo enkawl tawh a, mahse, World Cup 2002 a hruai thleng zo lo.

Barcelona, AZ Alkmaar leh Bayern Munich enkawl lehin a hlawhtling viau a, July 2012 khan Netherlands chu a vawi hnih nana enkawlin, World Cup 2014-ah pathumna a nihpui.

Manchester United a pan zui a, Old Trafford-ah beisei angin a hlawhtling lo. May 2016-a Red Devils a chhuahsan hnuah a chawlh reng hnuin nikum August aṭang khan Netherlands enkawl hna hi a thawk leh ṭan.

Ajax aṭanga a coaching career ṭantu coach hian Netherlands a enkawl leh hnuah match kua an khel leh tawh a, tlawm an nei miah lo - group hmahruaitu ni chungin World Cup khel turin an tling.

Van Dijk chuan, "Min mamawh hun apiangah group angin a tana kan awm reng tur thu ka hrilh. Kan World Cup khelh tur pawh hi a tana hriatreng tlak tura kan khelhchhuah theih ka beisei tlat a ni," tiin a sawi.