Stamford Bridge-ah Real Madrid an leng dawn

Chelsea leh Real Madrid-in inhmachhawn an châk lo ve ve ang tih a chiang a, mahse, Champions League quarterfinal-a intawng tura pawh fuh an ni dun miau si - football fans lawmah a tla.

Zanin dar 12:30 hian quarterfinal first leg khelh a ni dawn a, Chelsea-in Real Madrid an mikhual dawn - team pahnihin result ṭha an mamawh a, a hmuhnawm loh ring suh.

UK sorkarin Roman Abramovich a hrem hnuah Chelsea-in khelmual chhungah aiin pawn lamah chanchin an ngah zawk a, chanchin lawmawm hriat tur an nei tlem em em bawk.

Blues hi an league match hnuhnung berah Brentford lakah an mualpho a, Real Madrid hi tun hnaia an result avangin coach Carlo Ancelotti dinhmun a derthawng nia sawi a awm bawk - zanin inkhel a hmuhnawm dawn.

Chelsea an tawlhthlu
League Cup final-a Liverpool an ngam loh hnuah Chelsea hi inelna hrang hrangah match ruk chhung a zawnin an chak thei a, hetih chhung hian FA Cup semifinal lutin Champions League quarterfinal an inpetkai.

Khelmual pawn lam buainain Chelsea a tibuai lo tih a lang. Mahse, Blues-in Real an hmachhawn hma, chak an mamawh vanglai takin league-ah team tenau Brentford an ngam lo a, an khelmualah ngei 4-1 in an tlawm.

An budget zahve pawh nei phak lo Brentford-in Chelsea an hneh theih avangin Real-in Thomas Tuchel-a naute an zuam sawt ang tih a chiang a, inrintawkna mamawh lai taka heti zata tlawm hi Chelsea tan a pawi thui thei.

Mahse, Blues hian Real an mikhual hmain chanchin lawmawm an nei - hliam vanga chawl Reece James a dam tawh a, English defender hi chhawr theih a nih chuan Tuchel-a'n a formation duh ber hmangin tlarhnungah player pathum a rem leh thei ang.

Blues beiseina
Champion lai Chelsea tan semifinal pawh luh phak loh hi mualphona a tling dawn a, zaninah Santiago Bernabeu an lenluh huna hna a awlsam theih nan chak ngei an mamawh.

International break-a ram tan a fehchhuah avanga Brentford laka inlan thei lo Christian Pulisic a inlan thei tawh dawn a, American forward hi danglamna thlen turin a ṭha tawk.

Pulisic hi tlarhmaah Kai Havertz leh Mason Mount nen inkawp tura ngaih an ni a, chuti a nih chuan Brentford laka bul ṭan Timo Werner leh Hakim Ziyech ten bench lam an luahlum a ngai dawn tihna a ni.

Midfield-ah N'Golo Kante leh Mateo Kovacic an inkawp a rinawm a, Real midfielder Toni Kroos, Casemiro leh Luka Modric te nena an inhmachhawn tur hi football ngaina inti tan chuan en châkawm a tling.

Ancelotti a chiang lo
Chelsea tan chanchin lawmawm hriat tur a awm a, Real coach Ancelotti chuan Covid-19 vangin an league match hnuhnung berah pawh Real a kaihruai thei lo a, he thu buatsaih lai hian London-a a zin theih dawn leh dawn loh a la chiang lo.

Blues tan chuan Stamford Bridge-a an coach hlui dinhmun chiang lo hi chanchin lawmawm a tling a, King Carlo a inlan loh chuan Madrid khaw club hi an zuam sawt ang.

Hetihrual hian Real hi El Clasico-ah Barcelona ngam loin an mualpho a, an league match hnuhnung bera Celta Vigo an hnehna inkhelah pawh penalty vawi thum an hmu a, an vannei hle.

Real-in La Liga-ah point 12 ngawtin hma la hruai fal mah se Barcelona-in hma an sawn zel avangin ngaihthah an thiang lo a, El Clasico-a an mualphonain Ancelotti dinhmun a tiderthawng bawk.

Chak a ngai
Ancelotti-a'n Champions League aṭanga Paris Saint-Germain a petchhuah khan hahipin Italian coach an fak a, Lionel Messi a dah bo dan chu ngaihnawm ti takin an sawi a, season thara Real zawm turin Kylian Mbappe pawh a hmin hle niah an ngai.

Mahse, ni rei a liam hman lo - Ancelotti dinhmun derthawn thuin Spanish media titi a luah a, Barca laka an tlawm ngat phei kha chuan a counter-attacking style leh player a siksawi tlem dan thlengin an sawisel leh tawh.

International break lai khan Real president Florentino Perez leh Ancelotti an inbia a, Perez hian Ancelotti hi a dinhmun a him thu a hrilh - mahse, kum 2015-a Real-in an ban hma khan Perez leh Ancelotti hi an lo inbe hmasa tawh.

Italian coach hian, "Perez nena inhmuh a ngaih kha chuan ka chawlh a hnai tih ka hrethiam," tiin a lo sawi tawh a, tunah an inbe leh ta - King Carlo hian season thara Real enkawl chhunzawm turin chak a mamawh tih a hrethiam ang.

Derthawnna
Ancelotti dinhmun tiderthawng zual turin nipuiah coach awl an awm nual dawn - Mauricio Pochettino chu PSG chhuahsan tura beisei a ni a, Erik Ten Hag-a'n Ajax chhuahsan a hreh tawh lo.

Real legend Raul Gonzalez-a'n kum thum chhung Real B team a enkawl tawh a, senior team enkawl turin a inpeih tawh - Ancelotti-a'n a dinhmun luah châk an tam tih a theihnghilh loh a ṭha.

Hetihlai hian season thara neitu thar a zira Chelsea chhuahsan thei reng Thomas Tuchel-a'n chak a duh ve tho a, Real a pet chhuak thei a nih chuan a petchhuah club hian season tharah an awt zual ang.

Tuchel chuan, "Brentford lakah kan tlawm a, mahse, kha inkhel kha Real nena inkhel tur teh nan a tling lo. Brentford tana ṭha ber tura ngaih ka thlang a, kan rilruah Real an awm lo," a ti a, an result hnuhnung ber avangin a chi ai lo.

Kir lehna
Chelsea fans tan zanin hi zan lunglenthlak a ni dawn - Ancelotti hi an coach hlui a nih piahlamah Eden Hazard leh Thibaut Courtois te chu Blues-a an vanglai hun lo hmang tawh an ni.

Hazard-a'n Real a pan hnuah beisei a phak lo a, zaninah pawh bul a ṭan a rinawm lo. Courtois erawh a ṭhat ngaiin a la ṭha reng a, kum 29 mi keeper chuan, "Stamford Bridge-ah hlim taka hun hman ka beisei.

"Mahse, tunah chuan hmelma kan ni tawh a, annin chak an duh angin kei pawhin chak ka duh dawn - hei vang hian fans-in min lawm pawh ka beisei chuang lo," a ti a, "Min auh el loh hram erawh ka beisei," a ti.

Courtois-a chak duhna tihlawhtling turin Karim Benzema a pawimawh leh dawn - French striker hian tun season-ah match 35 khelin goal 34 leh assist 14 a nei a, goal 17 leh assist 14 nei tawhtu Vinicius Junior pawh theihnghilh a thiang lo.