Milan leh Bologna inkhelah goal lut lo

Olivier Giroud-a'n bul a ṭan a, second half-ah Zlatan Ibrahimovic pawh a lut - mahse AC Milan chuan an mikhual Bologna lakah goal an khung thei lo, 0-0 a inhnehtawkin point khatah an lungawi a ngai.

Milan hian point 67 hmuin Serie A hmahruaitu chu an la ni tho, khelh zat inangah pahnihna Napoli aia an sanna erawh point khat chauh a ni a, match khat chetsualah an dinhmun a inthlak daih thei, boruak a sang zel dawn.

A goal lo
Thawhṭanni zan San Siro-a inkhelah, mualneitu Milan lamin ball chang tamin inkhel an thunun viau a, mahse hun ṭha insiam erawh an harsat. France international striker Giroud-a tauh chu keeper Lukasz Skorupski chuan ṭha takin a lo dansak.

Giroud bakah Rafael Leao chuan remchang a hmu, mahse goal chungah a thlawh chhuak. Bologna tan striker Marko Arnautovic pawhin goal khung theihna remchang nei mah se goal pawnah a pet chhuak ve tho a ni.

Milan hian hliam vamngin Simon Kjaer leh Tiemoue Bakayoko te an la chhawr thei lo, tun hnaiah Alessio Romagnoli a hliam thar leh bawk avangin season tir lama an ṭhat dan ang tak kha chuan an khel thei rih lo.

Ibra a lawm lo
Kum 40 mi a ni tawh a, hliamin a tlak buak fo bawk avangin tun hnaiah Ibrahimovic a inkhel tam lo - goal pawh a khung lo rei ta. Tun hnai thla hnih chhung chu goal a khung lo, khelmual chhunga a boruak erawh a la na hle.

Swede striker hi thisen chhuak khawpin a la ṭang thei a, a club Milan chu chakpui tumin theihtawp takzet a la chhuah. Hun tawp dawn lama Bologna lamin hun an khawral lui chu a haw hle a, inkhelh banah referee a sawisel zui bawk.

Ibra chuan, "Ka lawmpui che, ka lawmpui che," tiin referee Livio Marinelli a ti el a, an referee chu Bologna duh ang ngeia hun khawhral phalsakah a puh. Player-te tur hmanhmawh tur zawkin a ṭanpui niah a ngai hmiah tihna a ni.

An buai lo
Stefano Pioli-a'n Milan a enkawl china a match 100-na a ni a, duhthusam result nei chiah lo mah se an buai phah loh tur thu a sawi. An tan Serie A nomawi chu ban phak maia la awm reng a nih thun a sawi bawk.

AC Milan manager Pioli chuan, "Kan inkhel kha khaikhawm a harsa lo, a hmawr kan bawk fuh thei lo deuh tih mai a ni. A dangah chuan kan khel chhe lo a, point hmuh tuma theihtawp chhuah team lakah chuan duh ang thlapa khelh hi a harsa ve bawk a ni," a ti.

Milan hian an khelh bakah - Inter Milan, Lazio, Fiorentina leh Atalanta te an hmachhawn tur zingah an la tel. Kum 2011 hnua a vawi khat nan 'Scudetto' lak an duh a nih chuan hmasawn leh hret chu an ngai dawn niin a lang.