Everton nge tla dawn Burnley?

Premier League relegation battle a ngaihnawm a, club hlun Everton pawh an dinhmun a derthawng hle. Zanin dar 12:00 hian Frank Lampard-a kaihhruai Toffees-in anmahni ang bawka tla thei dinhmuna ding Burnley chu Turf Moor-ah an tlawh dawn a, inkhel pawimawh bik a ni ang.

Everton hian match 28 aṭangin point 25 an hmu a, 17-naah awmin relegation zone-a awm Watford aiin match hnihin khel tlem mah se point thum chauhin an hmu tam. Burnley hian Toffees ang thoin match 28 chauh an la khel a, 19-naah awm mah se Frank Lampard-a hote hi point li chauhin an pha lo a, zanin inkhel tur hi relegate tur zawnna final ang mai a ni.

Benitez nge Lampard?
Everton hian season ṭantirhah fan-te duh lo chungin an hmelma team Liverpool enkawl tawhtu Rafael Benitez an lalut a, season bul ṭan chhe lo mah se September thla hnu lamah result ṭha an nei thei meuh lo. Toffees hian match hmasa pasarih aṭangin point 14 an hmu a, season thara European football khelh sawi ri hman hial.

Amaherawhchu match sarih dang an khelh belh a, point khat chiah an hmuh belh. Benitez hnuaiah Everton-in September hnu lamah vawi khat chiah hnehna an chang a, vawi kua ngawt an chak lo. Spanish manager hi relegate tura rinkai Norwich City an hneh loh zawhah an ban.

Manager awm loh chhungin Duncan Ferguson-a'n Toffees a enkawl a, Aston Villa an hneh lo. Lampard-a'n January 31-ah manager hna a chelh ṭan a, transfer tawp niah Delle Ali leh Donny van de Beek te a lalut nghal. League-ah erawh Lampard-a'n Newcastle hneh loin bul a ṭan a, Leeds United talbuai 3-0 in hneh ve bawk mah se chak aiin chak loh an ngah zawk.

Lampard hnuaiah league match riat khelhah vawi hnih chiah an la chak a, a bak match rukah an chak lo vek. Benitez hnuaiah Toffees hian match tinah point khat an hmu a, English manager hnuaiah erawh match tinah 0.75 point an hmu chauh. Everton hi an relegate a nih chuan Benitez hming sawi ri tawh loin Lampard hi mawhphurtu a ni thei ang.

Hmabak a hautak
Premier League table thlir chuan Everton hi an kutah engkim a la awm. Amaherawhchu fixtures thlir chuan Toffees dinhmun hi a ṭha lo. Lampard-a hote hian Burnley an hmachhawn zawh hian Manchester United an mikhual lehnghal dawn.

Toffees hian Leicester City ṭum hnih an la hmachhawn dawn a; Liverpool, Chelsea, Leicester City, Watford, Brentford, Crystal Palace leh Arsenal te an khelh hmabakah an la awm avangin point hlawhchhuah a har dawn.

Harsatna belhchhah turin Lampard hnuaiah Everton-in khelh dan nghet an nei lo. Burnley lakah hrem vangin Michael Keane leh Allan te an chhawr thei dawn lo a, hliam vangin Andre Gomes, Fabian Delph leh Tom Davies te an inlan thei dawn lo bawk.

Everton hian chhuanlam erawh an nei thiang lo. Man United, Liverpool leh Chelsea te an hmachhawn zui dawn avangin team nem zawka ngaih Burnley an hneh ngei a ṭul. A êng zawnga thlir chuan Richarlison leh Dominic Calvert-Lewin te an dam ṭha a, an goal bawh a na sawt ang.

Burnley ve thung
Burnley hian match hnuhnung paliah an chak lo vek a, goal an khung lo vek bawk. Sean Dyche-a hoten insiamṭhat an mamawh a, an elpui Everton lakah chetsual a thiang lo. Striker thar Wout Weghorst-a'n match 10 aṭangin goal khat chiah a khung a, Clarets an him theih nan Dutch forward chet ṭhat hi a ṭul hle.

Clarets manager Dyche chuan, "Hetiang inkhel pawimawhah hi chuan tute mahin chak loh an duh lo. Chutihrualin season pumpui hi match khat lek aṭanga teh a rem lo. Everton nena kan inkhel tur hian nghawng lian tak chu a nei ngei ang a, mahse season pumpui thlirna tur chu a ni lo," tiin a sawi.

Everton chungchang sawi zuiin Dyche chuan, "Team chhia an ni lo. Player lei nan sum pawh an hmang hnem a, Premier League team ṭhatzia lantirtu an ni zawk," a khingpui tur a fak. Clarets hian an defender pawimawh Ben Mee an la chhawr thei dawn lo a, Nathan Collins-a'n hremna a hmachhawn bawk avangin James Tarkowski kawppui turin tun season-a match khat chiah la inlan Kevin Long a luh a rinawm. Clarets hi tlarhma leh tlarhnungah insiamṭhat an mamawh hle.