Villarreal hmaah Bayern Munich fiahna
Zanin dar 12:30 hian Champions League quarterfinal first leg-ah Bayern Munich leh Villarreal an inhmachhawn dawn a, El Madrigal-ah German champion fiahin an awm ang. Bavarians hi chak tur zawka rinkai ni mah se Europe inelna sangah thilmak a thleng fo a, Yellow Submarine hi zuam ngawt a rem lo.
Emery enkawl
Sevilla, PSG leh Arsenal te enkawl tawhtu Unai Emery hian Europe-ah sulhnu ṭha tak a nei. Spanish manager hian Europa League-ah Sevilla vawi thum a champion pui a, Arsenal final a thlenpui bakah Villarreal a champion pui tawh bawk.
Champions League-ah erawh Emery hian chhuan tham record nei lo mah se club lian a hmachhawn fo tawh a, khelh dan phung nghet ṭha tak a nei bawk. Emery hi defensive game khel ṭhinah an ngai a, a dikna chen awm mah se defence ngai pawimawh hmasa manager tia sawi hi a dik zawk.
Spanish manager hian attacking game a khel tel a, amaherawhchu tlarhnung a rem phui hmasa phawt ṭhin. Bayern lakah pawh hian Emery-a'n tlarhnungah player pali hmangin a player-te an hna tur chiang takin a hrilh ang a, Robert Lewandowski leh a ṭhiante hlawhchhamtir an tum ang.
Yellow Submarine hian UEFA Super Cup-ah Chelsea an hmachhawn a, penalty shootout an thlenpui. Tun ṭuma quarterfinal lut tur pawh hian last 16-ah Italian club ṭha Juventus an hneh. Emery hnuaiah Europe inelnaah hneh loh an la nei lo a, Bayern tan fimkhur a ṭul ang.
Ṭantu nei ṭha
Villarreal hi Spain rama khawpui pakhat a ni a, 2018 chhiarpui aṭanga a lan dan chuan mipui 50,577 chauh an cheng. Aizawla mihring cheng zat hi 2011 chhiarpuiah khan 293,416 a ni tawh a, Villarreal-a cheng zat let ruk dawn Mizoram khawpuiah an cheng tihna a ni.
Villarreal-ah hian mi cheng tam lo mah se an stadium El Madrigal-ah entu 23,500 a leng a, Bayern nena an inkhel tur atan hian ticket an hralh zawhna a rei tawh. Europa League final-a Manchester United an hneh ṭum khan Yellow Submarine-in ṭantu an nei ṭha tih an pholang a, penalty hmanga hnehna an chan theihna kawngah pawh an thawh hlawk. Bayern lakah pawh Villarreal ṭantuten an player-te an fuih phur ang.
Bayern chu Bayern
Villarreal tan chak theih dan a awm a, Bayern erawh Bundesliga nomawi ni loin Champions League-a an thlen chin hi an dinhmun tehna tur a ni. Yellow Submarine hi an hneh lo a nih chuan Julian Nagelsmann hnuaia season hmasa ber hi a ṭha lo tiin a sawi theih ang. Hei hian team pahnih danglamzia a sawifiah a, German champion hi rinkai zawk an ni tih a nemnghet bawk.
Bayern hian tun dinhmuna khawvel striker ṭha bera chhal ngam Robert Lewandowski an kawl a, Polish striker hian tun season-ah goal 45 tehmeuh a khung tawh a, Champions League bikah goal 12 a khung.
Lewy pui tur hian Thomas Muller, Leroy Sane leh Kingsley Coman te lut tura ngaih an ni a, Serge Gnabry a dam ṭha leh tawh bawk. Kartawp khan Freiburg 4-1 in an hneh a, midfield-ah Leon Goretzka rawn kirin Joshua Kimmich nen an inkawp leh thei a, Bayern tlarhma an inpeih.
Chutihrualin Nagelsmann-a'n defender Benjamin Pavard, Niklas Sule, Dayot Upamecano leh Lucas Hernandez te a nei chungin tlarhnung a phui lo a, Covid-19 vanga hun rei tak chawl tawh Alphonso Davies chu second leg-ah chauh a inlan thei dawn bawk.
Bavarians tlarhnung phui ṭha tawk lo hi neutral thlirna aṭang chuan inkhel tihmuhnawmtu a ni thei a, Villarreal tlarhmaa awm Gerard Moreno, Samuel Chukwueze, Giovani Lo Celso leh Arnaut Danjuma te an hmuhnawm sawt ang.
Villarreal hi Europa League champion lai an ni a, coach tawnhriat nei ṭha takin a enkawl a, khelh dan phung nghet an nei bawk. Juventus 3-0 in an hneh thei a, an ṭha tih a chiang. Mahse semifinal luh kan duh a, kan tum ram thleng turin kan hneh ngei a ṭul a ni. - Julian Nagelsmann, Bayern manager
Bayern hi la dam zinga team ṭha ber an ni. Hetianga team ṭha kan tum thei hi kan lawm. Khelh an harsa dawn tih kan hria a, hun hrehawm tak kan tawng dawn. Mahse, hlawhtlinna lian tham chan theihna kawng a inhawng a ni. - Etienne Capoue, Villarreal midfielder