Man United tan tihsual a thiang tawh lo - Rooney

Derby County manager Wayne Rooney chuan a club hlui Manchester United-in manager thar an ruat hunah tihsual an neih a thiang tawh loh thu a sawi - United hi Ajax manager Erik ten Hag leh PSG manager Mauricio Pochettino nen sawizawm mek an ni.

Kum 36 mi Rooney chuan, "Pochettino hian Premier League-ah tawnhriat a nei tawh a, manager pahnih inkara thlan turah Argentine manager hi ka thlang zawk ang. Hun erawh a mamawh dawn a, hun an pek chuan hna a thawk ṭha ang," a ti.

Poch chungchang sawi chhunzawmin Rooney chuan, "Sir Alex Ferguson hnuah manager hna luahlum thei an awm lo. Ole Gunnar Solskjaer pawh a fuh lo a, a thlakna pawh a dik chuang lo. Pochettino hi coach ṭha a ni a, star player leh naupang rual enkawl a thiam. Hei tak hi an tih dik ngai lai chu a ni a, manager lak chungchangah tihsual a thiang tawh lo," tiin a sawi.

England tana goal khung tam ber Rooney hian 2004 leh 2017 inkar khan Man United tan match 559 khelin goal 253 a khung a, Premier League-ah vawi nga a champion bakah Champions League, Europa League, Club World Cup, FA Cup leh League Cup (3) nomawi a chawi vek.

Tunah erawh Man United hian Champions League-a Atletico Madrid an hneh loh avangin season nga chhung chu nomawi an chawi dawn lo tih a chiang tawh.

Rooney chuan, "Man United inkhel hi ka en fo a, team ni loin mimalin an khel. Nomawi chawi leh tur chuan insiamṭhat nan season thum tal an mamawh dawn. Paul Pogba pawh chhuahtir mai hi a fuh zawk a, chutiang chiahin Cristiano Ronaldo pawh chhuak se a ṭha zawk.

"Pogba hian France leh Juventus tana a khelh ṭhin dan a pha lo a, Ronaldo hian goal pawimawh khung mah se a kum a upat tawh avangin ngaia neih chin a nei," tiin theihna nei sang Paul Pogba leh Cristiano Ronaldo te chhuak tura duh thu a sawi a, captain Harry Maguire leh Jesse Lingard te erawh cham turin a duh thung.