A chung berah Iga Swiatek

Iga Swiatek chu hmeichhe tennis world number 1 thar a ni chiang ta. Women's Tennis Association (WTA) ranking thar berah Swiatek hian Ashleigh Barty hmun ruak a luah a, tun hnaia che ṭha ber a nih bawk avangin pakhatna nih hi a phu.

Ranking a chhuah hmain Swiatek hian number 1 a ni dawn tih a hre lawk tawh. Number 1 ni lai Barty chu kum 25 mi chauh niin a chawl thut a, hei vang hian pakhatna thar an awm a ngai.

Kum 20 mi Swiatek hian tun hnaiah Indian Wells leh Miami Open nomawi a chawi, hmeichhe player zingah hetiang tithei palina a ni hial. A hnuaiah hian Czech Republic nula Barbora Krejcikova a awm thung.

Miami Open final-a chak lo zawk Naomi Osaka pawhin nasa takin hma a sawn. Japanese star hi a inkhelh tam loh avangin a ranking a hniam hman, tun ṭumah hian player 42 ngawt kal khumin 35-na dinhmun a luah.

Grand Slam vawi li champion tawh Osaka hian pangngai taka tennis a khel thei a nih chuan, tun hma lama ranking sang tak a neih ang kha a neih let leh theih a rinawm. Chutihrualin clay leh grass court hi a inkhelh thiam vak lohna a nih avangin a harsa mai thei.