Neroca an insiamṭha nghal

Churchill Brothers laka an tlawm hnuin Neroca an insiamṭha lehnghal a, Manipur club hian nimin khan 2-1 in Kenkre FC chu an hneh.

I League match sarih zet a zawna tlawm an neih loh hnuah Neroca hi Churchill lakah kar hmasa khan 4-2 in an tlawm a, mahse, nimin khan hnehna an chang lehnghal a ni.

Manipur club tan Sweden Fernandes chuan minute 24-na lekah mawi takin goal hmahruai a khung a, mahse, chawlhlawk hman hmain Ranjeet Singh Pandre chuan Kenkre tan a sut.

Team pahnihin inhneh-tawk chungin chawlhlawk an hmang a, second half ṭan phat aṭangin Neroca an nung lehnghal - Sergio Mendigutxia chuan khung ngei tura ngaih chu holam takin a hlah.

Mahse, Athletic Bilbao academy chhuak hian a tihsual thup mawi turin hun a duh rei lo - minute 50-naah an goal hnihna a khung a, 2-1 in Neroca an chak.

Kenkre tan midfielder PC Rohlupuia chu bench aṭanga luhtir a ni a, mahse, minute 80-naa luhtir player hian danglamna a thlen hman lo.

Neroca-in hnehna an chan avangin table-ah palina an ni a, championship stage khel phak tur team pasarih zingah an tel zel - Inrinni zanah Aizawl FC an hmachhawn leh dawn.

Mizo club hi nizan khan Manipur club tho Trau nen an inkhel a, he thu buatsaih a nih lai hian result kan hre hman lo - an chak chuan relegation stage an chhuahsan thei ang.

Championship stage-a awm team inkhelah Gokulam Kerala chuan 2-1 in Sreenidi Deccan an hneh a, table chung ber an luah - Kerala club tan hian Cameroon tana vawi li inlan tawh Aminou Bouba leh Jamaica international Jourdaine Fletcher ten minute 30 chhungin goal khat ve ve an khung.

Sreenidi tan Colom-bian striker David Castañeda Muñoz chuan goal khat khung ve mah se awmzia a nei phak lo - Gokulam tan Zodingliana Ralte chu bench aṭanga luhitr a ni a, Sreenidi tan Lalchungnunga leh Lalromawia ten bul an ṭan a, Vanlalbiaa Chhangte chu bench aṭanga luhtir a ni bawk.

Inkhel Results
Neroca 2 - 1 Kenkre FC
NER: Sweden Fernandes 24'; Sergio Mendigutxia 50'
KEN: Ranjeet Singh Pandre 45'
Sreenidi Deccan 1 - 2 Gokulam Kerala
SRE: David Castañeda Muñoz 49'
GOK: Aminou Bouba 4'; Jourdaine Fletcher 30'