National Basketball Championship-ah Mizoram-in Delhi hneh

Mizoram an chak ta e! 71st National Basketball Championship, Chennai-a khelh mekah nizan khan Mizoram chuan Delhi an hneh a, 57-54 in an chak a ni.

Mizoram hian an match hmasa pahnihah an khingpui Uttarakhand leh Tamilnadu-te an hneh lo a, an chak lohna zat pawh a tam viau a; nimahsela an game hnuhnung berah Delhi an hneh ta a ni.

Mizoram hi champion tura inelna aṭangin tla tawh mah se la, India rama basketball thiam dan indawt zawnna (ranking) atan team dang nen an la inkhel kual leh dawn niin MBBA hruaitute chuan Vanglaini an hrilh.