Liverpool-in an ke lehlamin semifinal an rap ta

A vawi khat nana quadruple champion nih tum Liverpool-in nomawi pakhat an hnaih leh ta sawt - Thawhlehni zan khan Champions League quarterfinal first leg-ah an inlan a, harsatna nei loin an chak.

Reds hian khualmualah Benfica chu 3-1 in an hneh a, Ibrahima Konate, Sadio Mane leh Luis Diaz ten goal khat ṭheuh an khung - Benfica tana Darwin Nunez chuan goal khat a khung ve bawk.

April 13, zan dar 12:30-ah team pahnihin second leg an khel leh dawn a, an khelhna tur hmun hi Anfield a ni thung. Reds-in goal hnihin hma an hruai a, mahni mualah second leg an khel zui dawn.

Liverpool-in an ke lehlamin semifinal an rap tawh, tia sawi theih a ni a, April 10-a Manchester City an lenchilh hmaa result duhawm an nei thei hi an lawm khawp ang.

Rin loh lamah
Liverpool-in tlarhmaah Mohamed Salah, Mane leh Diaz an tlar thei a, bench lamah Roberto Firmino leh Diogo Jota an la neih bawk avangin an ngaihtuahawm lo hle - an nawr na dawn tih a chiang nghal.

Mahse, Liverpool tana goal hmahruai khungtu erawh rin loh lam aṭangin a ni a, a hming chu Ibrahima Konate a ni! French defender hian Andrew Robertson-a corner aṭanga ball kal chu minute 17-naah a tauh lut.

Benfica player-ten an tih tur an ti tawk lo a, defender palian Konate an veng lo - Reds tana a goal hmasa ber a khung phah a, kum 22 mi defender tan zan chhinchhiahtlak a ni.

Corner pettu Robertson hi Benfica ṭantuten meitalhin (lighter) an vawm nasa a, Scottish defender hian inkhelh zawhah, "A êng zawngin ka thlir a, an mei zuk an bansan phah mai thei asin," tiin fiamthu a thawh zui.

A la tawk lo
Benfica-in mahni mualah goal an chhuah hmasa a, mahse, Liverpool bawk an hlauhawm chhunzawm - Mohamed Salah-a'n hming chherna remchang vawi hnih a nei a, mahse, a chhawr lo ve ve.

Minute 34-naah Trent Alexander-Arnold a inlar a, English right back ball pet thiam bik hian Diaz tan ṭha zetin ball a thlawh lut.

Colombian forward hian mahnia chinfel mai tum loin Mane tan a pe a, Senegalese forward hian striker class tih awm renga mawiin, talbuai hauh loin goal-ah a lo chantir.

Mane hi Liverpoool tana Champions League-a goal khung hnem pahnihna (22 goals) a ni nghal a, Reds legend Steven Gerrard (21) tlanpelin, Mohamed Salah (33) chiah a phak lo tawh.

Benfica beiseina
Liverpool-in harsatna nei loin goal hnih an khung a, awlsam takin an chak mai dawn niin a lang - mahse, goal khung loa chawlhlawk hmang Benfica-in ngaihdan dang an nei a, kut ruaka mahni mual chhuahsan an duh lo.

Second half ṭan aṭanga minute lina lekah Liverpool tana goal hmahruai khungtu Konate a chesual a, French defender hian Rafa Silva ball cross awlsam taka petchhuah tur chu a pet ṭhelh a, a chesual.

Konate hnunga ding Nunez chuan ball hi a lo chang fuh a, kum 22 mi striker hian European football-a hming langsar ni turin theihna a nei tih pholan nan a lo hmang a, si phurh a sut ṭhen.

Uruguay international hian tun season-ah Benfica tan inelna hrang hrangah match 35 khelin goal 28 a khung ta a, assist vawi thum a nei bawk. Champions League bikah match kua khelin goal nga a khung - Arsenal leh Manchester United ten an enthla mek.

A chinfelna Diaz
Benfica-in si phurh an rawn sut ṭhen a, goal khat chiaha him Liverpool thla a muang lo - Portuguese club an phur zual sauh a, Merseyside club an zuam sawt.

Brazil international Everton Soares chuan hnai set sawt aṭangin Alisson a enchhin a, Nunez -a'n a goal hnihna khung turin chance duhawm nei bawk mah se goal-ah a chantir thei lo.

Hun tawp nan minute thum chiah a awm tawh tihah Liverpool tan Diaz a inlar a, Colombian forward hian Naby Keïta ball siamsak chu um lutin, Benfica goalkeeper Odysseas Vlachodimos chawpa a bum hnuah goal-ah a chantir.

FC Porto aṭanga Liverpool pantu forward hi inkhelh chhung zawngin Benfica fan-ten an au el a, mahse, a club hlui hmelma fan-te auh buaina karah talbuai loin chak nemnghehna goal a khung ta zawk.

Khawiah nge Salah?
Benfica tana player langsar bera chhal ngam chu goalkeeper Odysseas Vlachodimos a ni a, hei hian inkhel dinhmun chiang takin a hrilhfiah -Reds-in goal thum an khung a, chance an hlah nual bawk!

Heti chung hian goal khung zingah Salah a tel lo a, Liverpool chak thu ziah ruala a goal khung thu ziah tel ngai ṭhin Salah-a'n goal a khung lo - World Cup khel phak lo hlim Egyptian forward hi khelmual pawn lamin a tibuai deuh em ni chu aw, tih mai tur a ni.

Salah hian Liverpool goal thumna khung turin chance duhawm a nei a, mahse, Vlachodimos a paltlang lo - goal ruak hmaa a tauh phak loh ball kha ni dang ni se, a zuan phak ang em? tih chu zawhna awm lo a ni hran lo.

Liverpool-in City an hmachhawn hmaa Salah insiamṭhat hi fan-te duhthusam a ni ang - chutihrual chuan Reds tana chance hlah hi Salah chiah a ni lo a, bench aṭanga luhtir Diogo Jota pawhin uiawm takin a hun ṭha neih a hlah.

Benfica khelmualah, Champions League match-a chak hi thil awlsam a ni lo - Benfica khan an nunna turin an bei a ni ber. Hmun awl kan pe nasa mah mah em aw, tih ka ngaihtuah a, mahse, kha aia ṭha zawka tlarhnung veng thei kan ni chungin goal khung kha an phu ve rengah ka ngai.

Counter attack hmangin min bei a, engtiklai pawhin ball a neih reng theih bik lo a, player an neih ṭhat avangin risk lak khan tihsualna chance a sang a ni. Ka beisei ang ngeiin inkhel hautak a ni a, fans pawh an tam.
Si hnih faiin hma kan hruai a, result ṭha ni mah se uanpui tur a ni lo tih kan hria. Goal an rawn khung a, kan duh aiin game a inhawng zui - an keeper kha an player ṭha ber a ni a, save pawh a nei ṭha hlawm hle.
Tunah hian half time chauh a la ni a, si hnihin hma kan hruai - theihtawp kan chhuah chhunzawm ang. Kan goal khung ṭhinna tam zawkah an keeper vangin kan khung lo a, fak a phu hle a ni. Hun tawp lamah khan khung tur kan ni a, 4-1 ni se duhthusam a ni - mahse, duhthusam ramah kan awm lo tih kan hria.

Benfica kan hrechiang a, Ajax khelmuala chak thei an ni - an quality kan hria a, second leg khelh hmain match khelh tur dang kan nei bawk. Mahse, kan inpeih ang. - Jurgen Klopp, Liverpool manager

*Klopp hi khualmuala match riat chhung a zawna Liverpool chakpui thei manager hmasa ber a ni a, hetih chhung hian vawi 16 goal khungin, vawi hnih chiah goal an chhuah.

Result ṭha zawk kan duh a, mahse, a theih tlat si loh. Second half kan khelh dan en ula, kan inringtawk a ni - Liverpool hi team ṭha tak an ni a, mahse, kan hlau lo. Second leg-a result ṭha tak nei turin theihtawp kan chhuah ang.

Goal ka khung vangin ka hlim lo - ka duh chu goal khung ni loin, nomawi a ni. Ngui tak chungin ka haw dawn a nih hi. - Darwin Nunez, Benfica striker

Champions League Quarterfinal
First Leg
April 5, Thawhlehni Zan
Manchester City 1 - 0 Atletico Madrid
MAN: Kevin De Bruyne 70'

Benfica 1 - 3 Liverpool
BEN: Darwin Nunez 49'
LIV: Ibrahima Konate 17'; Sadio Mane 34'; Luis Diaz 87'

April 6, Nilaini Zan ( Result kan hre hman lo)
Villarreal 12:30 AM Bayern Munich
Chelsea 12:30 AM Real Madrid

Second Leg
April 12, Thawhlehni Zan
Bayern Munich 12:30 AM Villarreal
Real Madrid 12:30 AM Chelsea

April 13, Nilaini Zan
Atletico Madrid 12:30 AM Manchester City
Liverpool 12:30 AM Benfica