James leh Lakers tan hmun a awm lo

Los Angeles Lakers chuan NBA playoff an khel phak dawn lo tih a chiang ta. Team ṭha zual 16 inelnaah LeBron James kan hmu phak dawn lo tihna a ni a, tun hnaiah a zawnin vawi sarih tehmeuh an tlawm nghawng chhuah a ni.

Nimin zing inkhelah hliam vangin LeBron James a inlan lo, a ṭhiante inkhel hi court sir aṭangin a lo ṭawiawm. Season kal laia team khel ṭha tluang ber Phoenix Suns lakah Lakers hi 121-110 in an tlawm.

NBA champion vawi 17 ni tawh Lakers hi regular season kal laiah vawi 48 teh meuh an tlawm tawh, 2020 NBA champion ni thei mah se tun hnaiah an hniam takzet; 2019 hnua a vawi khat nan playoff an khel phak dawn lo a ni.

Los Angeles Lakers coach Frank Vogel chuan, "A pawi takzet, fans lakah ngaihdam kan dil. Club neitu lamin hun remchang min siamsak a, thlawpna ṭha tak kan dawng chunga kan thlen chin hi a chhuanawm loh hle.

"A nihna takah chuan insiamṭha turin hun remchang pawh kan nei, kan tho chhuak thei tlat lo kha a mak leh pawi lai chu a ni. Tun hma aiin kan thawhrim lehzual zawk a ngai tihna a ni," tiin a sawi.

Playoff hi conference pakhata team 15 inel zinga a sang pariat ten an khel ṭhin, conference pahnih an awm avangin playoff khel zawng zawng chu team 16 an ni. Eastern leh Western conference champion an awm hnuah NBA Finals an khel ang.

NBA - Nimin Results
Philadelphia 76ers 131 - 122 Indiana Pacers
Cleveland cavaliers 115 - 120 Orlando Magic
Houston Rockets 105 - 118 Brooklyn Nets
Charlotte Hornets 115 - 144 Miami Heat
Atalanta Hawks 108 - 118 Toronto Raptors
Milwaukee Bucks 127 - 106 Chicago Bulls
Washington Wizards 132 - 114 Minnesota Timberwolves
Portland Trail Blazers 94 - 98 Oklahoma City Thunder
San Antonio Spurs 116 - 97 Denver Nuggets
Memphis Grizzlies 115 - 121 Utah Jazz
New Orleans Pelicans 123 - 109 Sacramento Kings
Los Angeles Lakers 110 - 121 Phoenix Suns