Mizo telna India vawi thum an chak

FIH Junior World Cup khelh laiah India an che ṭha. Mizo player pathum - Lalremsiami Hmar, Lalrindiki leh Marina Lalramnghaki telna India team hian group match pathumah hnehna an chang vek.

Pool D hmahruaitu ni chungin India hian Thawhlehni zan khan Malaysia an hmachhawn a, 4-0 in an hneh. An pool aṭangin India leh Germany ten quarterfinal an lut - India tan semifinal thleng turin South Korea hneh a ngai dawn.

100% chak
Potchefstroom, South Africa-a inelna neihah India hian bul an ṭan fuh a, pool match bikah chuan harsatna an tawk lo. Malaysia lakah pawh a tir aṭangin an khel hmuhnawm nghal a, a tawp thlengin an buai lo.

Hnahthial tleirawl Didiki'n goal khungah a inngai. Hockey India leh media tam tak pawhin Didiki goal tiin an ziak. Mahse, match scoring judge Hogan Laurine report dan chuan Mumtaz Khung anga ziah a ni.

Ball kalin goal line a pelh hmain Mumtaz-i hian a lo tawk hman a nih a rinawm. Didiki hian an goal hnihna pawh a siamsak a ni a, an match hmasa bera goal hnih khungtu hi Malaysia lakah goal khungtu anga ziah ni lo mah se a khel ṭha hle.

Mizo an pawimawh
Tournament-ah hian Mizo player pathum hi a ti kimtu an ni satliah lo, team tana mawhphurhna pawimawh chelhtu an ni. Lalremsiami'n match a la khel kim vek a, inkhel pathum zinga pahnihah goal a khung - team ṭha Germany laka a khung a pawimawh zual.

Didiki'n Wales leh Malaysia an hmachhawn a, goal a khung ve ve. Germany lakah inlan lo mah se a khelh chhunah a hmuhnawm leh che ṭha berte zinga mi a ni phak, a chesual viau a nih loh chuan senior team tan pawh a inlan phak thuai ang.

Defender Marina-i hming lam hmaih a thiang lo. Kawnpui tleirawl hi tlarhnung lama mi pawimawh a ni a, match thuma goal hnih chiah an chhuah avangin defender ten fak an phu - Wales leh Germany lakah a ṭhatzia a lantir thei a ni.