Ball chang tam Man City chakna goal khat chauh
Manchester City-in Thawhlehni zan khan Etihad Stadium-ah Atletico Madrid an mikhual a, Kevin de Bruyne goal hmangin 1-0 in an chak. Champions League quarterfinal first leg-ah Pep Guardiola hoten inkhel thunun mah se goal khat chauha an chak avangin ngaih ṭha taka awm a la thiang lo.
English champion leh Diego Simeone hote hi April 13, Thawhlehni zan dar 12:30 hian Wanda Metropolitano Stadium-ah an khel dawn. Atletico-in attacking game an khelh a ṭul tawh dawn avangin football hmuhnawm zawk thlir tur a awm ang.
Tum inang lo
Man City manager Guardiola-a'n bul ṭan tur a thlan danah thil danglam a awm lo. Right back Kyle Walker a khelh theih loh avangin Joao Cancelo chu mual dinglamah a awmin Nathan Ake chu vei lamah a awm thung.
Keeper Ederson hmaah Aymeric Laporte leh John Stones te an ding. Rodri chu mual laiah awmin Ilkay Gundogan leh De Bruyne ten an thlawp a, tlarhmaah Raheem Sterling, Bernardo Silva leh Riyad Mahrez te an awm.
Man City thil tum a chiang a, inkhel thunun chunga hnehna chang a ni. Atletico khelh dan hre turin hun rei nghah a ngai lo a, tlarhmaa awm Antoine Griezmann leh Joao Felix ten goal venhim hna an thawh nasat avangin Spanish club-in mualneitu thil tum tih hlawhchhamtir chu an tum ber a ni.
Keeper Jan Oblak hmaah defender panga Renan Lodi, Reinildo Mandava, Felipe, Stefan Savic leh Sime Vrsaljko te an awm a, midfielder pathum Geoffrey Kondogbia, Koke leh Marcos Llorente ten tlarhnung hi an thlawp bawk.
Atletico an hlawhtling
Mi nawlpuiin football hmuhnawm an tehna chu goal a ni a, goal em a luh loh pawhin goal chance tamna inkhel hmuhnawm an ti ṭhin. Man City leh Atletico inkhelah erawh Argentine manager Simeone-a'n a naute hna a hrilh chian avangin inkhel nung ṭha tak hmuh tur a awm lo a, tactical game ril tak an chhawp chhuak thung.
Man City hian first half-ah 70% ball possession an nei pha a, Atletico-in Man City lamah ball an chang meuh lo. Chutihrualin Simeone hote an tumah an hlawhtling zawk. A chhan chu Man City hian goal zawnah vawi khat mah an pet lo.
Cancelo leh Gundogan te shot bakah Mahrez, Cancelo leh De Bruyne te cross chuan keeper Oblak a ti buai pha lo. Atletico tlarhnung a phui ṭha hle. Chutihrualin Man City-in goal khung thei lo mah se Atletico-in counter attack hmanga an nawr let tur rang taka an chhu chat ṭhin chu mimal theihna nei sang bakah team hnathawh tih loh rual a ni lo.
A hming chu KDB
Man City-in nung takin second half-ah bul an ṭan a; Gundogan-a shot, De Bruyne freekick leh Laporte-a tauh over-te chu Simeone leh a hote tan hlauhawm lo thleng tura ralkhel dar a ni.
Pep Guardiola-a'n substitution awmze nei a siam zui a, minute 68-naah player pathum a rualin a thlak. Mahrez, Sterling leh Gundogan te aiah Phil Foden, Gabriel Jesus leh Jack Grealish te an lut.
Substitute Foden-a'n danglamna a rawn thlen nghal a, minute 70-naah a ball pek ṭha zet chu De Bruyne-a'n ṭha zetin a pet goal. Atletico-in goal venhim hna tawp thawk mah se an ṭang zo ta bik lo.
Belgian midfielder De Bruyne hian minute 80-naah chance dang nei leh mah se Atletico defender Savic-a'n a dansak a, goal dang a luh belh tawh lo. Atletico-in goal zawnah vawi khatmah an pet lo a, amaherawhchu goal khat chauh an chhuah avangin semifinal kawng a la ping lo.
Eng nge an sawi?
Team ṭha tak leh khelhpui har tak kan hmachhawn a, chutichung chuan result ṭha kan nei. An manager a fin em avangin duh angin a khelh theih lo a, goal dang kan khung belh thei lo. Bench aṭanga lutte an che ṭha a, Gabriel Jesus-a'n team a rawn ti chak sawt a, Jack Grealish-a'n ball a chelh thei bawk. - Pep Guardiola, Manchester City manager
Kan khingpui hi team ṭha chungchuang an ni a, player ṭha rual tum thuhmunin an khel thei a ni. Chutiang taka team ṭha lakah chuan ṭha takin kan khel thei a ni. Goal venhim a, counter attack hmanga nawr let kan tum. Chance insiam ve thei dawna kan ngaih lai takin kan lamah an khung. - Diego Simeone, Atletico manager