Kieran Tierney a chawl rei dawn

Arsenal defender pawimawh Kieran Tierney chu a khup hliam zai a ngai dawn a, a chawlh chen tur hi hriat theih la ni lo mah se tun season chhungin Premier League-ah a hmel kan hmuh hman a beiseiawm tawh lo.

Scotland international hi ram tana a feh chhuahna lama inhliam a ni a, London Colney-a training an neih laia hliam a ni. Gunners leh Crystal Palace inkhelah pawh a inlan thei lo, tun hnaiah zai a ngaih tur thu hi tih chian a ni.

North London club chuan thu chhuah siamin, "Kieran a dinhmun hi ngun taka zir chian hmasak a ni. Damdawi lam thiam leh club lamin a ṭha ber tur kan ngaihtuah hnuin zai a ngai dawn, tun kar tawp lamah zai a ni ang," an ti.

Mikel Arteta-a'n hliam vangin defender Takehiro Tomiyasu a chhawr thei lo mek, match hnuhnung bera hliam tuar Thomas Partey dinhmun a chiang lo mek bawk - Tierney hliam hi channa nasa tak a ni dawn.

Arsenal hian Tierney thlaktu tur an nei ṭha tawk lo. Palace lakah Nuno Tavares khelhtir a ni a, a rintlak loh. Portuguese defender hi chawlhlawkah lak chhuah niin midfielder Granit Xhaka pawh hnun a ngai hial.

Season thara Cham-pions League khelh tur Arsenal hian tlarhnung siksawi dan an ngaihtuah a ngai ang.